Live Updates

توشہ خانہ 2 کیس میں وکیل صفائی کے حتمی دلائل مکمل، سماعت 29 اکتوبر تک ملتوی

جمعرات 16 اکتوبر 2025 20:10

راولپنڈی (اُردو پوائنٹ اخبارتازہ ترین - این این آئی۔ 16 اکتوبر2025ء) پاکستان تحریک انصاف کے بانی و سابق وزیراعظم عمران خان اور ان کی اہلیہ بشری بی بی کے خلاف توشہ خانہ 2 کیس میں وکیل صفائی کے حتمی دلائل مکمل ہوگئے، جبکہ سماعت 29 اکتوبر تک ملتوی کردی گئی۔پاکستان تحریک انصاف کے بانی عمران خان اور ان کی اہلیہ بشری بی بی کے خلاف توشہ خانہ 2 کیس کی سماعت اسپیشل جج سینٹرل اسلام آباد شاہ رخ ارجمند نے اڈیالہ جیل میں کی۔

مقدمے کی سماعت کے دوران عمران خان اور بشری بی بی کو جیل سے کمرہ عدالت پیش کیا گیا، اس موقع پر عمران خان کی بہنیں، بہنوئی سہیل خان، نوشیروان برکی بھی عدالت میں موجود تھے۔دوران سماعت وکیل صفائی سلمان صفدر کے حتمی دلائل مکمل ہوگئے، آئندہ سماعت پر پراسیکیوشن اور وکلا صفائی مزید حتمی دلائل دیں گے۔

(جاری ہے)

سماعت کے دوران پی ٹی آئی کی سینیٹر مشال یوسفزئی، چیئرمین پی ٹی آئی بیرسٹر گوہر، اور جنرل سیکریٹری سلمان اکرم راجا بھی عدالت موجود تھے۔

سماعت کے دوران ملزمان کی جانب سے سلمان صفدر، قوسین فیصل، ظہیر عباس چویدری اور عثمان گل پیش ہوئے جبکہ پراسیکیوشن کی جانب سے بلال بٹ اور شہروز گیلانی نے پیروی کی۔خیال رہے کہ گزشتہ روز ہونے والی سماعت کے دوران 2 وکلاء صفائی کے دلائل مکمل ہوئے تھے۔