تخفیف غربت وعوامی معیار زندگی میں بہتری ہمارے اہداف میں سرفہرست ہے،مریم نواز کا عالمی یوم تخفیف غربت پر پیغام

جمعہ 17 اکتوبر 2025 22:28

لاہور (اُردو پوائنٹ اخبارتازہ ترین - اے پی پی۔ 17 اکتوبر2025ء) وزیراعلی پنجاب مریم نواز نے عالمی یوم تخفیف غربت پر اپنے خصوصی پیغام میں کہا ہے کہ عالمی یوم تخفیف غربت منانے کا مقصد بنیادی ضروریات سے محروم کروڑوں انسانوں کی طرف اقوام عالم کی توجہ مبذول کرواناہے، ترقی پذیر ممالک کے لئے تخفیف غربت کا ہد ف خصوصی اہمیت رکھتا ہے، وسائل کی غیر منصفانہ تقسیم سے غربت جیسی سماجی ناانصافی جنم لیتی ہے۔

وزیراعلی نے کہا کہ ہیلتھ، ایجوکیشن سمیت دیگر سہولیات کا کسی طبقے تک محدود ہونا بھی غربت کی کمی میں حائل سماجی ناانصافی ہوتاہے، حکومت پنجاب نے آسان کاروبار بزنس کارڈ، آسان کاروبار فنانس کے ذریعے ہزاروں افراد کے لئے روزگار کے شاندار مواقع پیدا کیے،لاکھوں ورکروں اور محنت کشوں کے لئے راشن کارڈ پراجیکٹ تخفیف غربت کے لئے اہم اقدام ہے۔

(جاری ہے)

انہوں نے کہاکہ حکومت پنجاب نوجوانوں کو صنعتی مارکیٹ کی ضروریات کے مطابق آئی ٹی ودیگر ٹیکنیکل ایجوکیشن میں مواقع فراہم کررہی ہے۔وزیراعلی مریم نواز نے کہا کہ نواز شریف آئی ٹی سٹی، روڈا اور راوی گرین سٹی جیسے پراجیکٹس سے لاکھوں افراد کے لئے روزگار کے مواقع پیدا ہوں گے، حکومت پنجاب کے صرف ستھرا پنجاب پراجیکٹ کے ذریعے ڈیڑھ لاکھ سے زائد افراد کو روزگار کے مواقع حاصل ہونا ایک ریکارڈ ہے، پسماندہ اور دوردراز اضلاع کے عوام کو صحت، تعلیم اور ٹرانسپورٹ کی جدید ترین سہولتوں کے تاریخی پراجیکٹ کا آغاز ہوچکا ہے۔انہوں نے کہاکہ تخفیف غربت اور عوام کے معیار زندگی میں بہتری ہمارے اہداف میں سرفہرست ہے۔