پاکستان کے عوام اور حکومت کی فلسطینی بھائیوں اور بہنوں سے وابستگی تاریخ کا روشن باب ہے،گورنر خیبرپختونخوا

ہفتہ 29 نومبر 2025 12:08

اسلام آباد (اُردو پوائنٹ اخبارتازہ ترین - اے پی پی۔ 29 نومبر2025ء) گورنر خیبرپختونخوا فیصل کریم کنڈی نے فلسطینی عوام کو خراجِ تحسین پیش کرتے ہوئے کہا ہے کہ پاکستان کے عوام اور حکومت کی فلسطینی بھائیوں اور بہنوں سے محبت، وابستگی اور حمایت تاریخ کا روشن باب ہے۔ہفتہ کو یومِ یکجہتیِ فلسطین کے موقع پر اپنے خصوصی پیغام میں انہوں نے صدرِ مملکت آصف علی زرداری کے بین الاقوامی یومِ یکجہتیِ فلسطین کے پیغام کو پاکستان کی قومی پالیسی کا حقیقی ترجمان قرار دیا۔

فیصل کریم کنڈی نے کہا کہ فلسطینی عوام نے جس عزم، ہمت اور ثابت قدمی کے ساتھ قربانیاں دی ہیں وہ پوری انسانیت کے لیے جذبہ حریت کی مثال ہیں۔ پاکستان اور فلسطین کے تعلقات نہ صرف تاریخی ہیں بلکہ ان کی بنیاد انسانیت، انصاف اور احترامِ آدمیت جیسے آفاقی اصولوں پر قائم ہے۔

(جاری ہے)

گورنر نے کہا کہ پاکستان نے ہمیشہ ہر عالمی فورم ، جیسے اقوام متحدہ، او آئی سی، آئی سی جے وغیرہ پر مظلوم فلسطینیوں کے حق میں مضبوط آواز اٹھائی ہے۔

پاکستان مسلسل غزہ پر اسرائیلی جارحیت، بے گناہ شہریوں کے قتلِ عام اور انسانیت سوز مظالم کی مذمت کرتا آیا ہے۔ ہم فوری، غیر مشروط اور مستقل جنگ بندی اور فلسطینی علاقوں تک بلا روک ٹوک انسانی امداد کی فراہمی کا مطالبہ کرتے ہیں۔انہوں نے کہا کہ پاکستان نے ہمیشہ فلسطینی عوام کی سیاسی، سفارتی، انسانی اور اخلاقی مدد کو اپنا فرض سمجھا ہے اور آئندہ بھی اس حمایت میں کوئی کمی نہیں آئے گی۔

پاکستان فلسطین کے ایک آزاد، خودمختار، قابلِ عمل اور مسلسل ریاست کے قیام کی بھرپور حمایت کرتا ہے، جو 1967 سے پہلے کی سرحدوں پر مبنی ہو اور القدس الشریف اس کا دارالحکومت ہو۔ہر مسلمان کی دلی خواہش ہے کہ ایک دن مجھے اپنے فلسطینی بھائیوں کے ساتھ مسجد الاقصیٰ میں سجدہ ریز ہونے کی سعادت حاصل ہو۔گورنر فیصل کریم کنڈی نے اس امید کا بھی اظہار کیا کہ دنیا کی اجتماعی آواز اور انسانی ضمیر فلسطینی عوام کے لیے امن، انصاف اور آزادی کا راستہ ہموار کریں گے۔