الحاج فواد جیسے کارکن مسلم لیگ (ن) کا سرمایہ ہیں ،عرفان صدیقی

پارٹی کی سینئر قیادت الحاج فواد کی خدمات کا اعتراف کرے اور ان کو جائز مقام دیاجائے،سینئر صحافی

بدھ 7 جنوری 2026 15:48

کراچی (اُردو پوائنٹ اخبارتازہ ترین - این این آئی۔ 07 جنوری2026ء) جاپان میں مقیم سینئر صحافی عرفان صدیقی نے کہا ہے کہ الحاج فواد جیسے کارکن مسلم لیگ (ن)کا سرمایہ ہیں ۔ وہ مسلم لیگ (ن)کے ان چند اولین اور بے مثال وفاداروں میں سے ایک ہیں، جنہوں نے سندھ میں پارٹی کی بنیادوں کو اپنے لہو سے سینچا۔پارٹی کی سینئر قیادت الحاج فواد کی خدمات کا اعتراف کرے اور ان کو جائز مقام دیا جائے ۔

عرفان صدیقی نے کہا کہ سیاست کے افق پر کچھ چہرے ایسے ہوتے ہیں جو جگمگاتے نہیں، مگر اپنی خاموشی میں پورے قافلے کو روشنی دیتے ہیں۔ ان کا نہ کوئی نعرہ گونجتا ہے، نہ ہی ان کے لیے کوئی بینر بنتا ہے۔ لیکن جب آپ کسی تحریک کی تاریخ کھولتے ہیں، تو ان کا سایہ ہر ورق پر بکھرا ہوا ملتا ہے۔ الحاج فواد بھی ایسا ہی ایک نام ہے۔

(جاری ہے)

اس شہر کے وہ علاقے جہاں نہ بجلی وقت پر آتی تھی، نہ پانی، وہیں سے فواد نے مزدور یونین کی سیاست کا آغاز کیا۔

جب باقی سیاسی جماعتیں ایوانوں اور جاگیروں میں مصروف تھیں، فواد عام آدمی کے ساتھ کھڑا تھا۔انہوںنے کہا کہ اگر نواز شریف کو کبھی کراچی کے وہ دن یاد آئیں، جب وہ مشکل میں تھے، اور پھر بھی جلسے کررہے تھے ۔تو وہ ضرور اس ایک شخص کو یاد کریں گے، جو ان کا سایہ بن کر کام کرتا رہا۔وہ شخص جو بینر پر نہیں، لیکن دل پر لکھا گیا۔انہوںنے کہا کہ نون لیگ کے بڑے بڑے جلسوں کی بات ہو اور الحاج فواد کا ذکر نہ آئے، یہ ممکن نہیں۔

جب کراچی میں نواز شریف کے جلسے ہوتے، تو ان کے نظم و نسق سے لے کر انتظامات تک ہر قدم پر الحاج فواد موجود ہوتا۔وہ خود ائرپورٹ جاتا، لیڈر کو خوش آمدید کہتا، انہیں جلسہ گاہ تک لے کر آتا، اور واپسی تک ان کے ساتھ رہتا۔یہ سب کچھ وہ بغیر کسی سرکاری پروٹوکول، بغیر کسی عہدے اور بغیر کسی تنخواہ کے کرتا۔عرفان صدیقی نے کہا کہ آج جب نون لیگ اقتدار کے ایوانوں میں ہے، جب میڈیا پر صرف بڑے نام بولتے ہیں، تو الحاج فواد جیسے کارکنوں کا ذکر کم ہوتا جا رہا ہے۔پارٹی کی سینئر قیادت الحاج فواد کی خدمات کا اعتراف کرے اور ان کو جائز مقام دیا جائے