خواجہ سلمان رفیق کی زیر صدارت چیف منسٹرز ایڈلٹ کارڈیک سرجری پروگرام کے حوالہ سے اہم اجلاس

لاہور (اُردو پوائنٹ اخبارتازہ ترین - اے پی پی۔ 28 فروری2026ء) صوبائی وزیر صحت خواجہ سلمان رفیق کی زیر صدارت چیف منسٹرز ایڈلٹ کارڈیک سرجری پروگرام کے حوالہ سے پنجاب ہیلتھ انشی ایٹو مینجمنٹ کمپنی میں اہم اجلاس منعقدہوا۔ اجلاس میں سیکرٹری محکمہ سپیشلائزڈ ہیلتھ کیئر اینڈ میڈیکل ایجوکیشن عظمت محمود نے وڈیو لنک کے ذریعے اجلاس میں شرکت کی ۔ اجلاس میں سی ای او پنجاب ہیلتھ انشی ایٹو مینجمنٹ کمپنی ڈاکٹر علی رزاق، سی ای او پنجاب انسٹی ٹیوٹ آف کارڈیالوجی لاہور پروفیسر بلال محی الدین بھی اجلاس میں موجود تھے۔

وڈیو لنک کے ذریعے راولپنڈی انسٹی ٹیوٹ آف کارڈیالوجی، فیصل آباد انسٹی ٹیوٹ آف کارڈیالوجی، وزیر آباد انسٹی ٹیوٹ آف کارڈیالوجی، ملتان انسٹی ٹیوٹ آف کارڈیالوجی و دیگر کارڈیک اداروں کے ذمہ داران نے شرکت کی ۔

(جاری ہے)

صوبائی وزیر صحت خواجہ سلمان رفیق نے اظہار خیال کرتے ہوئے کہاکہ وزیر اعلی پنجاب مریم نواز کی قیادت میں صحت کے شعبہ میں تاریخی اور بنیادی اقدامات اٹھائے جا رہے ہیں ۔

چیف منسٹرز ایڈلٹ کارڈیک سرجری پروگرام کے تحت امراض قلب کے مریضوں کو سالانہ 3 ارب روپے سے زائد کی رقم کے علاج معالجہ کی مفت سہولیات فراہم کی جائیں گی۔چیف منسٹر ایڈلٹ کارڈیک سرجری پروگرام میں نادرا کے ریکارڈ کے مطابق پنجاب کے تمام مستقل رہائشی شامل ہوں گے- اس پروگرام کے تحت سرکاری کارڈیک اداروں کو اپ گریڈ بھی کیا جا رہا ہے-اس پروگرام میں نجی کارڈیک اداروں کو بھی شامل کیا جائے گا۔

اس پروگرام کے بعد ایڈلٹ کارڈیک سرجریز کی ویٹنگ لسٹ میں واضح کمی آئے گی۔ خواجہ سلمان رفیق نے کہاکہ اس پروگرام میں ہر قسم کے دل کے آپریشن (ایڈلٹ کارڈیک سرجری) کے طریقہ کار اس پروگرام کے تحت شامل کئے گئے ہیں ۔سرکاری کارڈیک ادارے بنیادی اندراج اور علاج کے مراکز ہوں گے-نجی ہسپتالوں کو ریفرل صرف ملٹی ڈسپلنری ٹیم کے ذریعے کیا جائے گا۔

فی مریض سالانہ کوریج 10 لاکھ روپے کی ہو گی۔ایسے مریضوں کے لئے ریزرو فنڈ مختص ہوگا جن کا مقررہ پیکیج علاج کے دوران ختم ہو جائے یا جن کے پیچیدہ کیسز معیاری پیکیج کی حد سے تجاوز کر جائیں ۔عوام تک صحت کی بہترین سہولیات کی فراہمی کیلئے کوشاں ہیں ۔پنجاب کی عوام کو صحت کی بہترین سہولیات فراہم کرنے کیلئے تمام تر وسائل بروئے کار لائے جارہے ہیں -سیکرٹری محکمہ سپیشلائزڈ ہیلتھ کیئر اینڈ میڈیکل ایجوکیشن عظمت محمود نے اظہار خیال کرتے ہوئے کہاکہ چیف منسٹرز ایڈلٹ کارڈیک سرجری پروگرام کی کامیابی کیلئے آئی ٹی بیسڈ ڈیش بورڈ بنایا جائے گا-یہ پروگرام ہزاروں انسانی زندگیاں بچانے کا سبب بنے گا۔