Live Updates

حکومت کی طرف سے پیٹرولیم مصنوعات کی قیمتوں میں یکدم اضافہ کرنا عوام کے ساتھ سراسر ناانصافی اور زیادتی ہے، سندھ ترقی پسند پارٹی

حکومت مہنگائی پر قابو پانے کے بجائے عوام پر مزید بوجھ ڈال رہی ہے، جس کے باعث ملک میں معاشی بحران مزید سنگین ہوتا جا رہا ہے،ڈاکٹرقادر مگسی

ہفتہ 7 مارچ 2026 21:20

حیدرآباد(اُردو پوائنٹ اخبارتازہ ترین - این این آئی۔ 07 مارچ2026ء) سندھ ترقی پسند پارٹی کے چیئرمین ڈاکٹر قادر مگسی نے پیٹرولیم مصنوعات کی قیمتوں میں اچانک بڑے اضافے پر سخت ردعمل ظاہر کرتے ہوئے کہا ہے کہ حکومت کی طرف سے پیٹرولیم مصنوعات کی قیمتوں میں یکدم اضافہ کرنا عوام کے ساتھ سراسر ناانصافی اور زیادتی ہے، پہلے ہی مہنگائی کے طوفان نے عوام کو شدید مشکلات میں مبتلا کر رکھا ہے، اور اب پیٹرولیم کی قیمتوں میں اضافے نے عوام کی زندگی مزید اجیرن بنا دی ہے۔

ڈاکٹر قادر مگسی نے ایک بیان میں کہا کہ حکومت مہنگائی پر قابو پانے کے بجائے عوام پر مزید بوجھ ڈال رہی ہے، جس کے باعث ملک میں معاشی بحران مزید سنگین ہوتا جا رہا ہے، پیٹرولیم کی قیمتوں میں اضافے سے ٹرانسپورٹ، اشیائے خورونوش اور روزمرہ استعمال کی اشیا کی قیمتوں میں بھی اضافہ ہوگا، جس کا براہِ راست اثر غریب اور متوسط طبقے پر پڑے گا۔

(جاری ہے)

انہوں نے کہا کہ عوام کو خبردار رہنا چاہیے کہ اس اضافے کو ایران اور اسرائیل کی جنگ سے جوڑ کر عوام کو گمراہ کیا جا رہا ہے، جبکہ حقیقت میں یہ اضافہ افغانستان میں جاری فوجی آپریشن کے اخراجات کا بوجھ عوام پر ڈالنے کی کوشش ہے، انہوں نے حکومت سے مطالبہ کیا کہ پیٹرولیم مصنوعات کی قیمتوں میں کئے گئے اضافے پر فوری نظرثانی کی جائے اور عوام کو مزید معاشی مشکلات سے بچانے کے لئے سنجیدہ اقدامات کئے جائیں۔