Live Updates

میاں افتخار حسین کی زیر صدارت اے ین پی خیبر پختونخوا کی صوبائی کابینہ کا اجلاس

بدھ 22 اپریل 2026 20:27

پشاور (اُردو پوائنٹ اخبارتازہ ترین - اے پی پی۔ 22 اپریل2026ء) عوامی نیشنل پارٹی(اے این پی) خیبر پختونخوا کی صوبائی کابینہ کا اجلاس میاں افتخار حسین کی زیر صدارت منعقد ہوا۔ پارٹی کی جانب سے جاری بیان کے مطابق اجلاس میں تنظیمی امور، سیاسی صورتحال اور دیگر اہم معاملات پر تفصیلی غور کیا گیا۔ اس موقع پر صوبائی صدر اے این پی میاں افتخار حسین نے کہا کہ بلدیاتی انتخابات کسی بھی وقت متوقع ہیں، پارٹی کو ہر سطح پر تیار رہنا ہوگا، ویلج کونسلز اور نیبرہڈ کونسلز سے ضلعی سطح تک تمام تنظیموں کو مزید فعال اور متحرک ہونا ہوگا۔

(جاری ہے)

انہوں نے کہا کہ خطے میں امن کے قیام کے لیے پاکستان کے مثبت کردار کو سراہتے ہیں۔ ایران امریکہ جنگ بندی میں پاکستان کی ثالثی اور کوششیں خوش آئند ہیں۔ اے این پی عدم تشدد کی پیروکار ہے اور جنگ کو مسائل کا حل نہیں سمجھتی۔ انہوں نے کہا کہ خیبر پختونخوا حکومت امن اور گڈ گورننس میں مکمل طور پر ناکام ہو چکی ہے۔ صوبے بھر میں دہشتگردی اور بدامنی میں اضافہ صوبائی حکومت کی نااہلی ہے۔صوبائی حکومت کو عوامی مسائل کے حل کے لیے سنجیدگی دکھانی ہوگی۔ انہوں نے کہا کہ اے این پی ہر فورم پر عوام کے حقوق، امن اور جمہوریت کےلیے جدوجہد جاری رکھے گی۔