کراچی میں منشیات و گٹکا کی سرعام فروخت، نوجوان نسل تباہی کے دہانے پر، اموات میں اضافہ ہوا، رضوان نیازی

جمعرات 23 اپریل 2026 22:25

کراچی (اُردو پوائنٹ اخبارتازہ ترین - این این آئی۔ 23 اپریل2026ء) پی ٹی آئی سندھ کے نائب صدر رضوان نیازی نے کراچی میں منشیات، گٹکا، ماوا اور دیگر نشہ آور اشیا کی سرعام فروخت پر شدید تشویش کا اظہار کرتے ہوئے کہا ہے کہ یہ صورتحال نوجوان نسل کے مستقبل کے لیے انتہائی خطرناک ہے اور شہر بھر میں ایک منظم نیٹ ورک کے ذریعے منشیات فروشی جاری ہے۔انہوں نے کہا کہ کراچی کے مختلف علاقوں میں مبینہ طور پر چرس، ہیروئن، آئس (کرسٹل میتھ)، افیون اور دیگر مہلک نشہ آور اشیا آسانی سے دستیاب ہیں، جس کے نتیجے میں نوجوان تیزی سے نشے کی لت میں مبتلا ہو رہے ہیں اور اموات و سنگین بیماریوں میں اضافہ ہو رہا ہے۔

رضوان نیازی نے کہا کہ منشیات اور گٹکا کے استعمال سے منہ کے کینسر، جگر کے امراض اور دیگر جان لیوا بیماریوں کے کیسز میں خطرناک حد تک اضافہ ہو چکا ہے، جو ایک بڑے عوامی صحت کے بحران کی شکل اختیار کر رہا ہے۔

(جاری ہے)

انہوں نے پولیس کی کارکردگی پر سوال اٹھاتے ہوئے کہا کہ شہر میں منشیات فروشی کے بڑھتے ہوئے نیٹ ورک کے باوجود مثر کارروائی نہ ہونا سنگین سوالات کو جنم دیتا ہے۔

عوامی حلقوں میں یہ تاثر بھی پایا جاتا ہے کہ بعض علاقوں میں یہ نیٹ ورک بلا رکاوٹ چل رہا ہے، جو ادارہ جاتی کارکردگی پر بڑا سوالیہ نشان ہے۔پی ٹی آئی سندھ نے مطالبہ کیا ہے کہ منشیات اور گٹکا مافیا کے خلاف فوری، بلا امتیاز اور سخت کارروائی کی جائے، تعلیمی اداروں کے اطراف خصوصی کریک ڈان کیا جائے اور نوجوان نسل کو تباہی سے بچانے کے لیے ہنگامی بنیادوں پر مثر اقدامات کیے جائیں۔