وزیراعلی اسٹروک پروگرام،تین ماہ میں 12کروڑ سے زائد مالیت کا علاج، مزید 24سینٹرز قائم کرنے کا فیصلہ

لاہور (اُردو پوائنٹ اخبارتازہ ترین - این این آئی۔ 24 اپریل2026ء) وزیر اعلیٰ خصوصی پروگرام برائے سٹروک مینجمنٹ کے تحت جنوری سے مارچ 2026 تک مریضوں کا 12 کروڑ سے زائد کی خطیر رقم سے علاج معالجہ کیاگیا،شعبہ صحت میں انقلابی و تاریخی اقدامات کو عملی شکل دینے کی جانب اہم اقدامات جاری ہیں،وزیراعلیٰ سٹروک پروگرام پر عملدرآمد بارے اہم پیش رفت ہوئی ہے اور پنجاب کے مختلف شہروں میں مزید 24 سٹروک سنٹرز کے قیام پر برق رفتاری سے کام جاری ہے۔

صوبائی وزیر صحت خواجہ سلمان رفیق کی زیر صدارت پنجاب ہیلتھ انشی ایٹو مینجمنٹ کمپنی میں اہم اجلاس منعقد ہوا۔ سیکرٹری محکمہ ایمرجنسی سروسز پنجاب ڈاکٹر رضوان نصیر نے وڈیو لنک کے ذریعے اجلاس میں شرکت کی۔سی ای او پنجاب ہیلتھ انشی ایٹو مینجمنٹ کمپنی ڈاکٹر علی رزاق اور پروفیسر قاسم بشیر نے بھی اجلاس میں شرکت کی۔

(جاری ہے)

وڈیو لنک کے ذریعے سپیشل سیکرٹری ڈویلپمنٹ احمد کمال مان، ایڈیشنل سیکرٹری میڈیکل ایجوکیشن ڈاکٹر سدرہ سلیم، ایڈیشنل سیکرٹری پروکیورمنٹ انور بریار، ایگزیکٹو ڈائریکٹر پنجاب انسٹی ٹیوٹ آف نیورو سائنسز پروفیسر آصف بشیر، میڈیکل ڈائریکٹر چلڈرن ہسپتال لاہور پروفیسر ٹیپو سلطان، فوزیہ سجاد، پرنسپل فاطمہ جناح میڈیکل کالج پروفیسر حمیدالدین، رحیم یار خان سے وزیر علی خان، پروفیسر ڈاکٹر محمد اطہر جاوید و دیگر افسران و ماہرین نے شرکت کی۔

پروفیسر قاسم بشیر نے اجلاس کو وزیر اعلیٰ سٹروک پروگرام بارے تفصیلی بریفنگ دی۔اجلاس میں افسران نے پروگرام کو سراہا اور قیمتی آراء بھی پیش کیں۔صوبائی وزیر صحت خواجہ سلمان رفیق نے کہاکہ وزیر اعلیٰ سٹروک پروگرام کے تحت فالج کے مریضوں کو اربوں روپوں کی خطیر رقم کے علاج معالجہ کی مفت سہولیات فراہم کی جا رہی ہیں،یہ پروگرام ہزاروں انسانی زندگیاں بچانے کا پروگرام ہے،وزیراعلیٰ پنجاب مریم نواز شریف ہر ضلع میں سٹروک مینجمنٹ سنٹر قائم کرنے کی پہلے ہی منظوری دے چکی ہیں۔

خواجہ سلمان رفیق نے کہاکہ ہر ڈی ایچ کیو میں نیورالوجسٹ اور پیڈز نیورالوجسٹ تعینات کرنے کے اصولی فیصلے پر عملدرآمد جاری ہے، ہر ضلع میں ڈاکٹرز اورنرسز کو فوری طورپر سٹروک مینجمنٹ ٹریننگ کروانے کا میکزم وضع کیا جا رہا ہے، مزید سپیشلایزڈ سٹروک انٹروینشنلسٹس کی ٹریننگ بھی جاری ہے۔وزیرصحت پنجاب نے کہاکہ فالج کے علاج کیلئے گولڈن آورز کی اہمیت مسلمہ ہے، صوبائی وزیر صحت نے فالج کے علاج کیلئے عوامی آگاہی مہم شروع کرنے کی ہدایت کی ۔

خواجہ سلمان رفیق نے کہاکہ پنجاب کے ہر چلڈرن ہسپتال میں سٹروک مینجمنٹ سنٹر بنانے کیلئے لائحہ عمل طے کر لیا گیا ہے، چاہتے ہیں کہ کسی مریض کو فالج کے علاج کیلئے بڑے شہر نہ جانا پڑے، خواجہ سلمان رفیق پروفیسر قاسم بشیر کی بریفنگ نے بریفنگ میں بتایاکہ 25 سال سے زائد العمر 4 میں سے ایک شخص فالج کا خطرہ ہوتا ہے، فالج کے پری ہاسپٹل،ہاسپٹل اور پوسٹ ہاسپٹل کیئر کیلئے آگاہی اورٹریننگ لازمی ہے۔