محسن نقوی کی زیر صدارت اجلاس، غیر قانونی ہاؤسنگ سوسائٹیز کے خلاف سخت کارروائی اور جدید تفریحی منصوبوں کی منظوری

اسلام آباد (اُردو پوائنٹ اخبارتازہ ترین - آن لائن۔ 29 اپریل2026ء) وزیر داخلہ محسن نقوی کی زیر صدارت ایک اہم اجلاس منعقد ہوا، جس میں وفاقی دارالحکومت میں جاری عوامی ترقیاتی منصوبوں اور نئے منصوبوں پر پیش رفت کا تفصیلی جائزہ لیا گیا۔ چار گھنٹے طویل اجلاس میں شہری سہولیات کی بہتری، شفافیت کے فروغ اور جدید انفراسٹرکچر کی تعمیر سے متعلق اہم فیصلے کیے گئے۔

اجلاس کے دوران کیپیٹل ڈویلپمنٹ اتھارٹی (سی ڈی ای) کے تمام ریکارڈ کو ڈیجیٹلائز کرنے کا فیصلہ کیا گیا، جسے 120 دن کے اندر مکمل کرنے کی ہدایت دی گئی۔ وزیر داخلہ نے کہا کہ اس اقدام سے شہری اپنی درخواستوں کا اسٹیٹس خود آن لائن معلوم کر سکیں گے، جس سے شفافیت میں اضافہ ہوگا۔محسن نقوی نے واضح کیا کہ اسلام آباد میں کسی بھی غیر قانونی ہاؤسنگ سوسائٹی کو کام کرنے کی ہرگز اجازت نہیں دی جائے گی اور اس حوالے سے سخت اقدامات کیے جائیں گے۔

(جاری ہے)

اجلاس میں نئے کنونشن سنٹر، ایکسپو سنٹر اور اسلام آباد ارینہ کی تعمیر کے منصوبوں پر بھی پیش رفت کا جائزہ لیا گیا، جبکہ تین بین الاقوامی کمپنیوں کی پری کوالیفکیشن مکمل ہونے پر اطمینان کا اظہار کیا گیا۔ وزیر داخلہ نے ہدایت کی کہ ان منصوبوں کی تعمیر ای سی او سمٹ سے قبل مکمل کی جائے۔اجلاس میں ایف-6 سیکٹر میں خدمت مرکز کے قیام کے لیے اراضی مختص کرنے کا فیصلہ بھی کیا گیا۔

مزید برآں شہریوں کو جدید تفریحی سہولیات فراہم کرنے کے لیے ٹاپ گالف، ہاٹ ایئر بیلون، زپ لائن، واٹر پارک اور امیوزمنٹ پارک جیسے منصوبوں پر جلد کام شروع کرنے کی ہدایت دی گئی۔کھیلوں کے فروغ کے لیے جدید سپورٹس کمپلیکسز کے قیام پر بھی اتفاق کیا گیا، جبکہ وزیر داخلہ نے کو لندن کے ہائیڈ پارک کی طرز پر ترقی دینے اور شادرہ ڈیم کے اطراف تفریحی سہولیات کے جامع منصوبے طلب کر لیے۔

اس کے علاوہ ایکسپریس وے اور کلب روڈ کی بیوٹیفکیشن اور لائٹنگ کا کام فوری شروع کرنے کی ہدایت دی گئی۔ اجلاس میں سی ڈی اے میں کرپشن اسکینڈل بے نقاب کرنے پر چیئرمین سی ڈی اے سہیل اشرف اور ممبر اسٹیٹ زمان وٹو کو مبارکباد دی گئی، جبکہ واضح کیا گیا کہ کرپشن میں ملوث کسی بھی فرد کو کوئی رعایت نہیں دی جائے گی۔چیئرمین سی ڈی اے نے وزیر داخلہ کو مختلف منصوبوں پر تفصیلی بریفنگ دیتے ہوئے بتایا کہ ایکسپریس وے پر سروس روڈ کی تعمیر پلاننگ ڈویڑن کی منظوری کے بعد شروع کی جائے گی۔ اجلاس میں شہری ترقی کے عمل کو تیز اور مؤثر بنانے کے عزم کا اعادہ کیا گیا۔