ٰسنگاپور میں پاکستان کے 60 سالہ سفارتی تعلقات کی تقریب، روح پرور قوالی کی محفل نے سماں باندھ دیا

جمعہ 1 مئی 2026 23:36

سنگاپور (اُردو پوائنٹ اخبارتازہ ترین - آن لائن۔ 01 مئی2026ء) پاکستان ہائی کمیشن سنگاپور کے زیر اہتمام اور Esplanade ط Theatres on the Bay کے اشتراک سے پاکستان اور سنگاپور کے درمیان سفارتی تعلقات کے 60 سال مکمل ہونے کے موقع پر ایک شاندار قوالی کی محفل کا انعقاد کیا گیا۔ایسپلانیڈ تھیٹر میں ‘‘At the Feet of the Beloved’’ کے عنوان سے منعقدہ اس روح پرور تقریب میں سفارتی حلقوں، کاروباری شخصیات، فنونِ لطیفہ سے وابستہ افراد اور پاکستانی کمیونٹی کی بڑی تعداد نے شرکت کی۔

معروف قوال رضوان و معظم نے صدیوں پر محیط صوفیانہ قوالی روایت کو پیش کرتے ہوئے حاضرین کو مسحور کر دیا۔ یہ فنکار لیجنڈری قوال نصرت فتح علی خان کے بھتیجے ہیں، اور ان کی دلنشین و روحانی پرفارمنس کو بے حد سراہا گیا۔تقریب سے خطاب کرتے ہوئے ہائی کمشنر رابعہ شفیق نے قوالی کو محبت، ہم آہنگی اور روحانیت کا اظہار قرار دیا۔

(جاری ہے)

انہوں نے کہا کہ یہ فن نہ صرف پاکستان کے ثقافتی ورثے کی نمائندگی کرتا ہے بلکہ مختلف ثقافتوں کے درمیان پل کا کردار ادا کرتے ہوئے لوگوں کو قریب لانے کا مؤثر ذریعہ بھی ہے۔

تقریب کے موقع پر پاکستان کی جانب سے ثقافتی روابط کے فروغ اور عوامی سطح پر تعلقات کو مزید مضبوط بنانے کے عزم کا اعادہ کیا گیا۔ ہائی کمشنر کی جانب سے سفارتکاروں اور معزز مہمانوں کے اعزاز میں استقبالیہ بھی دیا گیا۔یہ تقریب پاکستان کے بھرپور ثقافتی ورثے کو اجاگر کرنے کے ساتھ ساتھ سنگاپور کے ساتھ تعلقات کو مزید مستحکم بنانے کی عکاسی بھی کرتی ہے۔