قطر کی جانب سےامریکی صدر کو تحفے میں دیے گئے طیارے کی آزمائش مکمل،رونمائی کے لئے تیار

ہفتہ 2 مئی 2026 09:26

واشنگٹن (اُردو پوائنٹ اخبارتازہ ترین - اے پی پی۔ 02 مئی2026ء) امریکہ کی فضائیہ نے اعلان کیا ہے کہ قطر کی جانب سے صدر ڈونلڈ ٹرمپ کو تحفے میں دیے گئے بوئنگ 747 طیارے نے اپنی آزمائشی پروازیں (فلائٹ ٹیسٹنگ) باضابطہ طور پر مکمل کر لی ہیں اور توقع ہے کہ یہ رواں موسمِ گرما میں اپنی پہلی پرواز بھرے گا۔خبر رساں ادارے اے ایف پی کے مطابق امریکی فضائیہ کی جانب سے جمعے کو جاری کردہ بیان میں کہا گیا ہے کہ طیارے میں ترامیم اور فلائٹ ٹیسٹنگ کا کام مکمل ہو چکا ہے اور اب اس پر رنگ و روغن کا عمل جاری ہے۔

بیان کے مطابق یہ طیارہ اپنے نئے سرخ، سفید اور نیلے رنگ کے ڈیزائن کے ساتھ رواں برس موسمِ گرما میں منظرعام پر لائے جانے کے لیے تیار ہے۔قطر نے یہ طیارہ مئی 2025 میں پیش کیا تھا جسے وزیرِ دفاع پیٹ ہیگستھ نے اسی ماہ ’تمام وفاقی قواعد و ضوابط کے مطابق‘ قبول کر لیا تھا۔

(جاری ہے)

پینٹاگون کے ترجمان شان پارنیل نے اس وقت کہا تھا کہ محکمہ دفاع اس بات کو یقینی بنائے گا کہ صدر کی نقل و حمل کے لیے استعمال ہونے والے اس طیارے کے لیے تمام ضروری سکیورٹی اقدامات اور مشن کی ضروریات کو مدنظر رکھا جائے۔دوسری جانب صدر ڈونلڈ ٹرمپ اس طیارے کو قبول کرنے سے متعلق کسی بھی اخلاقی مسئلے کی تردید کر چکے ہیں۔ان کا موقف ہے کہ امریکی حکومت کے لیے اس طیارے کو قبول نہ کرنا ’بیوقوفی‘ ہو گی۔