تحریک تحفظ آئین ، پی ٹی آئی کا عمران خان کی رہائی ،آئین کے تحفظ کیلئے تحریک شروع کرنے کا اعلان

لاہور(اُردو پوائنٹ اخبارتازہ ترین - این این آئی۔ 02 مئی2026ء) تحریک تحفظ آئین اور پاکستان تحریک انصاف نے بانی چیئرمین پی ٹی آئی عمران خان کی رہائی اور آئین کے تحفظ کے لئے تحریک شروع کرنے کا اعلان کرتے ہوئے کہا ہے کہ ہماری کسی سے کوئی دشمنی نہیں ،ہم لڑائی جھگڑے والے لوگ نہیں ،فیصلہ کر لیا ہے کہ گلی گلی جائیں گے،مائنس عمران خان کا ماحول بنایا جا رہا ہے، ایسی ہر کوشش کی مزاحمت کی جائے گی ،اداروں سے کہتے ہیں کہ سیاست آپ کا کام نہیں ۔

عمران خان کی رہائی کے لئے اجلاس کے بعد تحریک تحفظ آئین پاکستان کے سربراہ محمود اچکزئی ، تحریک انصاف کے سیکرٹری جنرل سلمان اکرم راجہ ، اسد قیصر ، سردار لطیف کھوسہ ، عمر ڈار اور حقوق خلق پارٹی کے عمار جان نے مشترکہ پریس کانفرنس کی۔

(جاری ہے)

محمود خان اچکزئی نے کہا کہ تمام ادارے برباد ہو چکے ہیں، دنیا میں کہیں نہیں سنا کہ کسی پارٹی کا انتخابی نشان لے لیا جائے،بانی چیئرمین پی ٹی آئی اس ملک کا سب سے مقبول لیڈر ہے، یہاں آج وفاداریاں نہ بیچنے والے غدار ہیں ۔

ہم کہتے ہیں پاکستان میں منتخب پارلیمنٹ ہو، طاقت کا سرچشمہ پارلیمنٹ ہو ، فیصلے منتخب پارلیمنٹ کرے ، ہماری کسی سے کوئی دشمنی نہیں ہے، ہم لڑائی جھگڑے والے لوگ نہیں ہیں۔انہوںنے کہا کہ نواز شریف ، شہباز شریف ، آصف زرداری، عمران خان بڑے آدمی ہوں گے لیکن سب سے بڑا پاکستان ہے ، ہم نے فیصلہ کر لیا ہے کہ گلی گلی جائیں گے،ہم اداروں سے کہتے ہیں کہ سیاست آپ کا کام نہیں ۔

انہوں نے کہا کہ انہوںنے کہا کہ مائنس عمران خان کا ماحول بنایا جا رہا ہے، ایسی ہر کوشش کی مزاحمت کریں گے ۔ آ پ مائنس کرنے والے ہوتے کون ہیں،ہم جلسے جلوس نکالیں گے ، ہم پر امن رہیں گے اور اگر ہمارا راستہ روکا گیا تو یاد رکھو عوام جیت جاتے ہیں۔انہوں نے کہا کہ ہم وارننگ دے رہے ہیں کہ ہمارا راستہ نہ روکنا،ہم خانہ جنگی نہیں کریں گے، ہمیں جدو جہد نہ کرنے دی گئی تو پھر ہم کہیں گے کہ جیلیں کھول دیں ، آپ کی جیلیں بھر جائیں گی، آپ کو جیلوں میں جگہ نہیں ملے گی ۔

سلمان اکرم راجہ نے کہا کہ سیاست کا واحد محور یہ ہے کہ ہم بانی چیئرمین پی ٹی آئی کے ساتھ کھڑے ہیں،ہم آخری دم تک عمران خان کے ساتھ وفا نبھائیں گے، کیونکہ آج عمران خان کے ساتھ پاکستانی قوم کھڑی ہے۔انہوں نے کہا کہ اگر کوئی یہ سمجھتا ہے کہ پاکستانی قوم کو جھٹلایا جا سکتا ہے، اس ملک میں حرمت کو دھتکارا جا سکتا ہے، یا اس ملک میں آواز کو دبایا جا سکتا ہے تو وہ بے وقوف ہے، ایسا ہرگز نہیں ہوگا،تاریخ گواہ ہے کہ عوام کے ریلے کو کوئی طاقت نہیں روک سکتی اور عوام کا یہ ریلا عمران خان کو آزاد کرائے گا۔

انہوںنے کہا کہ آج عمران خان کی رہائی اور ان کی صحت سے بڑھ کر ہمارے لیے کچھ اہم نہیں،ہم آج پاکستان کے ہر مزدور اور ہر کسان سے کہتے ہیں کہ تمہارا مستقبل، تمہاری حقیقی آزادی، عمران خان کی آزادی سے منسلک ہے،ہم نے اکٹھے لڑنا ہے، ہم نے تمہاری آزادی کے لیے لڑنا ہے، تمہارے روزگار کے لیے لڑنا ہے۔انہوں نے مزید کہا کہ آج ہماری سیر حاصل گفتگو ہوئی ہے، مزید گفتگو بھی ہوگی،عمران خان نے محمود خان اچکزئی پر اعتبار اور بھروسہ کیا ہے۔

محمود خان اچکزئی کو قومی اسمبلی میں قائد حزب اختلاف بنانے کا فیصلہ عمران خان کا ہے۔سلمان اکرم راجہ نے کہا کہ عمران خان کا مجھے حکم ہے کہ میں محمود خان اچکزئی اور علامہ راجہ ناصر عباس سے مشاورت اور رہنمائی لوں ،ہم ان کی رہنمائی اور مشاورت سے آگے بڑھیں گے، ہم ایک ایسی جماعت ہیں جو تاریخ کا شعور رکھتی ہے، تاریخ کو سمجھتی ہے اور جانتی ہے کہ آج پاکستان کہاں کھڑا ہے،ہم جانتے ہیں کہ آج پاکستان کی معیشت کی کیا حالت ہے۔

انہوںنے کہاکہ آج کسان رو رہا ہے، مزدور بیروزگار ہے اور بے روزگاری پاکستان کی تاریخ کی بلند ترین سطح پر ہے، آج ایک بے حس حکومت ہے جو عیاشیاں کر رہی ہے، جہاز خرید رہی ہے، دنیا سے تعریفیں سمیٹ رہی ہے لیکن مزدور کا چولہا نہیں جل رہا۔ پورے پاکستان میں مزدور اپنی جائز اجرت مانگتا ہے مگر اسے اجرت نہیں ملتی،نوجوان کو روزگار نہیں ملتا، مزدور کے بچے کو تعلیم نہیں ملتی اور نہ ہی صحت کی سہولتیں میسر ہیں۔

انہوں نے کہا کہ ہم نے عمران خان کی رہنمائی میں یہ جنگ لڑنی ہے اور اس جنگ کو لڑنے کے لیے ہم موجود ہیں،ہم کبھی اس میدان سے پیچھے نہیں ہٹیں گے، ہم ڈٹے ہوئے ہیں۔اس موقع پر پاکستان تحریک انصاف اور تحریک تحفظ آئین پاکستان کے رہنمائوں نے آئین کے تحفظ اور بانی پی ٹی آئی کی رہائی کے لیے جلسے جلوس کرنے کااعلان کیا۔اسد قیصر نے کہا کہ پنجاب میں کسانوں کا استحصال ہو رہا ہے، ہم کسانوں کے ساتھ ہیں، کسان تنظیموں کے پاس جائیں گے، ان کو اپنے ساتھ انگیج کریں گے، کسانوں کے ساتھ مل کر تحریک چلائیں گے ، یہ پارٹی عمران خان کی ہے،اگر کوئی سمجھتا ہے کہ وہ بانی کی جگہ لے سکتا ہے تو وہ غلط فہمی میں ہے،ہماری جدوجہد پرامن ہوگی،جدوجہد کرنا ہمارا آئینی حق ہے۔