سی ایس ایس 2025ء کے ٹاپر عسید رفیق کے رزلٹ کارڈ میں دلچسپ حقائق

لازمی مضامین میں بمشکل کامیابی، انٹرویو میں ملنے والے غیر معمولی نمبروں نے ٹاپ پوزیشن دلادی

ساجد علی اتوار 3 مئی 2026 13:14

اسلام آباد (اُردو پوائنٹ اخبارتازہ ترین۔ 03 مئی2026ء) ملک میں سی ایس ایس 2025ء کے ٹاپر عسید رفیق کے رزلٹ کارڈ میں دلچسپ حقائق سامنے آگئے۔ وفاقی دارالحکومت سے تعلق رکھنے والے سینیئر صحافی رانا غلام قادر کی ایک حالیہ رپورٹ نے سی ایس ایس 2025ء کے نتائج کے حوالے سے ایک نئی بحث چھیڑدی ہے، اس رپورٹ میں ملک بھر میں پہلی پوزیشن حاصل کرنے والے امیدوار عسید رفیق کے مارکس کی تفصیلات بتائی گئی ہیں جو کسی حیرت سے کم نہیں۔

جنگ اخبار میں شائع خبر کے مطابق سینٹرل سپیریئر سروسز (CSS) کے سالانہ امتحان 2025ء میں ٹاپ کرنے والے امیدوار عسید رفیق کے نتائج کے اعداد و شمار نے سب کو ورطہِ حیرت میں ڈال دیا ہے، نتائج کے تجزیے سے معلوم ہوتا ہے کہ عسید رفیق نے لازمی مضامین میں بمشکل کامیابی حاصل کی، لیکن انٹرویو اور اختیاری مضامین میں ان کی غیر معمولی کارکردگی نے انہیں ملک بھر میں پہلے نمبر پر پہنچادیا۔

(جاری ہے)

سی ایس ایس میں عام طور پر سمجھا جاتا ہے کہ ٹاپرز انگریزی اور دیگر لازمی مضامین میں بہت زیادہ نمبر لیتے ہیں، لیکن عسید رفیق کا رزلٹ اس کے برعکس ہے، انہوں نے انگلش ایسے (Essay) میں 100 میں سے صرف 42 نمبر حاصل کیے (پاسنگ مارکس 40 تھے)، انگلش کمپوزیشن میں 100 میں سے محض 40 نمبر لیے یعنی وہ بالکل پاسنگ لائن پر رہے، اسلامک اسٹڈیز میں 100 میں سے 43 نمبر حاصل کیے، یہاں بھی پاسنگ مارکس 40 تھے، جنرل نالج میں 300 میں سے مجموعی طور پر 158 نمبر حاصل کیے جب کہ پاس ہونے کے لیے 120 نمبر درکار تھے۔

سی ایس ایس میں پورے پاکستان میں فرسٹ پوزیشن حاصل کرنے والے اسید رفیق USAID Rafiqu کا تعلق ٹوبہ ٹیک سنگھ کے چک 252 گ ب لسوڑی سے ہے
ان کے والد میاں عابد رفیق گورنمنٹ سکول کے ریٹائرڈ ٹیچر ہیں جبکہ والدہ بھی سکول ٹیچر اور ان کی بہن ڈاکٹر ہیں یاد رہے کہ ان کے گاؤں سے تعلق رکھنے والے… pic.twitter.com/2YngLd3zGQ
— Ather Salem® (@AthSal01) May 2, 2026

رپورٹ سے معلوم ہوا ہے کہ عسید رفیق کی تحریری امتحان میں اصل طاقت ان کے اختیاری مضامین (Optional Subjects) ثابت ہوئے جہاں انہوں نے بہترین سکور کیا، پولیٹیکل سائنس میں 200 نمبروں میں سے 133 نمبر حاصل کر کے اپنی پوزیشن مستحکم کی، پبلک ایڈمنسٹریشن میں 100 میں سے 81 نمبر لے کر غیر معمولی کارکردگی دکھائی، تاہم عسید رفیق کی کامیابی میں سب سے اہم کردار ان کے انٹرویو کا رہا، تحریری امتحان میں لازمی مضامین میں کمزور اسکور کے باوجود انٹرویو میں ملنے والے غیر معمولی نمبروں نے انہیں ٹاپ پوزیشن پر فائز کردیا۔