معاون خصوصی برائے اطلاعات خیبرپختونخوا کا عالمی یومِ آزادیٔ صحافت پر پیغام

اتوار 3 مئی 2026 14:23

پشاور (اُردو پوائنٹ اخبارتازہ ترین - اے پی پی۔ 03 مئی2026ء) معاون خصوصی برائے اطلاعات خیبر پختونخوا شفیع جان نے عالمی یومِ آزادیٔ صحافت پر اپنے پیغام میں عالمی یوم آزادی صحافت پر شعبہ صحافت سے وابستہ تمام افراد کو انکی بے لوث خدمات پر خراج تحسین پیش کیا ہے۔ اتوار کو دفتر معاون خصوصی برائے اطلاعات و تعلقات عامہ حکومت خیبرپختونخوا پشاور سے جاری بیان میں انہوں نے کہاکہ یہ دن ہمیں یہ احساس دلاتا ہے کہ آزاد اور ذمہ دار صحافت ایک مضبوط جمہوری معاشرے کی بنیاد ہے، آزاد صحافت جوابدہی اور عوامی شعور کے فروغ میں کلیدی کردار ادا کرتی ہے، قابل اعتماد معلومات تک رسائی، مکالمہ اور باہمی اعتماد کے فروغ میں میڈیا کا کردار نہایت اہم ہے۔

انہوں نے کہاکہ آزاد میڈیا امن، معاشی استحکام، پائیدار ترقی اور انسانی حقوق کے تحفظ کے لیے ناگزیر ہے، موجودہ دور میں معلومات کی تیز ترسیل کے ساتھ جھوٹی خبروں، پروپیگنڈے اور مصنوعی ذہانت کے غلط استعمال کے چیلنجز بھی بڑھ رہے ہیں۔

(جاری ہے)

انہوں نے کہا کہ یہ امر قابل تشویش ہے کہ دنیا بھر میں آزادیٔ صحافت کو مختلف دباؤ کا سامنا ہے، صحافیوں کو درپیش خطرات اور ان کے معاشی مسائل فوری توجہ کے متقاضی ہیں۔

انہوں نے کہا کہ صوبائی حکومت آزادیٔ صحافت، صحافیوں کے تحفظ اور ان کے پیشہ وارانہ حقوق کے فروغ کے لیے پُرعزم ہے۔ انہوں نے کہا کہ فرائض کی ادائیگی کے دوران جانوں کا نذرانہ پیش کرنے والے صحافیوں کو خراج عقیدت پیش کرتا ہوں۔ صحافت جیسے مشکل پیشے میں جان قربان کرنے والے صحافیوں کی قربانیاں ہمیشہ یاد رکھی جائیں گی۔