صدر پاکستان ہاکی فیڈریشن کی ڈسٹرکٹ ہاکی ایسوسی ایشن راولپنڈی کے عہدیداران سے ملاقات

پیر 4 مئی 2026 18:48

لاہور (اُردو پوائنٹ اخبارتازہ ترین - اے پی پی۔ 04 مئی2026ء) پاکستان ہاکی فیڈریشن کے صدر محی الدین احمد وانی نے وزیر اعظم شہباز شریف کے وژن کے مطابق پاکستان ہاکی کو بحال کرنے کے عزم کا اعادہ کرتے ہوئے کہا ہے کہ کھیل کی کھوئی ہوئی ساکھ کی بحالی کے لیے تمام تر ممکنہ کوششیں کی جائیں گی۔ان خیالات کا اظہار انہوں نے پیر کو ڈسٹرکٹ ہاکی ایسوسی ایشن راولپنڈی کے عہدیداران سے ایک ملاقات کے دوران کیا۔

ملاقات میں سینئر سپورٹس جرنلسٹ ذوالفقار بیگ، ڈی ایچ اے کے صدر ظہیر الحق، سیکرٹری طاہر شیرازی اور خزانچی محمد زاہد بھی موجود تھے۔محی الدین وانی نے گفتگو کرتے ہوئے بتایا کہ ملک بھر میں اسکول اور کالج کی سطح پر ہاکی کے فروغ کے لیے ایک جامع حکمت عملی تیار کر لی گئی ہے۔

(جاری ہے)

اس منصوبے کے تحت راولپنڈی اور دیگر شہروں میں کوالیفائیڈ کوچز کی زیر نگرانی لڑکوں اور لڑکیوں کے لیے خصوصی ڈیویلپمنٹ پروگرام شروع کیے جائیں گے تاکہ نوجوان ٹیلنٹ کو قومی کھیل کی طرف راغب کیا جا سکے۔

انہوں نے مزید کہا کہ کھلاڑیوں کو بہترین مواقع فراہم کرنے کے لیے اسپانسر شپ کے تعاون سے قومی اور بین الاقوامی ہاکی ایونٹس بھی منعقد کروائے جائیں گے۔پاکستان ہاکی فیڈریشن کے دروازے ہر اس شخص کے لیے کھلے ہیں جو حقیقی معنوں میں ہاکی کی بہتری کے لیے کام کرنا چاہتا ہے۔ پاکستان کی ہاکی کی میراث کو دوبارہ قائم کرنے کے لیے اجتماعی کوششیں ناگزیر ہیں۔

اس موقع پر ظہیر الحق نے اعلان کیا کہ سابق صدر پی ایچ ایف پرویز اسلم کیانی کی یاد میں شہناز شیخ ہاکی اسٹیڈیم میں ایک خصوصی ہاکی ایونٹ منعقد کیا جائے گا جس میں محی الدین وانی، سابق سینیٹر چوہدری تنویر خان اور رکن قومی اسمبلی بیرسٹر دانیال چوہدری بطور مہمان خصوصی شرکت کریں گے۔صدر پی ایچ ایف نے پاکستان میں ہاکی کی بہتری اور فروغ کے لیے اٹھائے جانے والے تمام اقدامات کے لیے اپنے مکمل تعاون کا یقین دلایا۔