Live Updates

حملہ کیا تو دنیا کے نقشے سے مٹا دیں گے

اگر ایران نے خطے میں امریکی مفادات یا بحری جہازوں کو نشانہ بنایا تو اسے ایسی قیمت چکانی پڑے گی جو تاریخ میں کبھی نہیں دیکھی گئی، صدر ٹرمپ کی ایران کو سخت وارننگ

پیر 4 مئی 2026 23:15

واشنگٹن(اُردو پوائنٹ اخبارتازہ ترین - آن لائن۔ 04 مئی2026ء) امریکی صدر ڈونلڈ ٹرمپ نے ایران کو سخت ترین لہجے میں خبردار کرتے ہوئے کہا ہے کہ اگر ایران نے خطے میں امریکی مفادات یا بحری جہازوں کو نشانہ بنایا تو اسے ایسی قیمت چکانی پڑے گی جو تاریخ میں کبھی نہیں دیکھی گئی۔صدر ٹرمپ نے انکشاف کیا کہ امریکی بحری بیڑے اور جنگی جہاز اس وقت آبنائے ہرمز میں تجارتی جہازوں کی بحفاظت نقل و حمل کو یقینی بنانے کے لیے فعال کردار ادا کر رہے ہیں۔

ان خیالات کا اظہار انہوں نے امریکی ٹی وی چینل کو دیے گئے ایک خصوصی انٹرویو میں کیا۔صدر ٹرمپ نے واضح کیا کہ امریکہ عالمی تجارت کی راہ میں کسی بھی رکاوٹ کو برداشت نہیں کرے گا۔ایران کے مبینہ ’’پروجیکٹ فریڈم‘‘ اور جہازوں پر حملوں کے حوالے سے گفتگو کرتے ہوئے صدر ٹرمپ نے انتہائی سخت موقف اپنایا۔

(جاری ہے)

انہوں نے کہا کہ "اگر ایران نے ہمارے یا ہمارے اتحادیوں کے جہازوں پر حملے کرنے کی جرات کی، تو ہم اسے دنیا کے نقشے سے مٹا دیں گے۔

ایران کو یہ بات اچھی طرح سمجھ لینی چاہیے کہ وہ آگ سے کھیل رہا ہے۔"امریکی صدر نے مشرق وسطیٰ میں امریکی فوجی تیاریوں کا ذکر کرتے ہوئے کہا کہ خطے میں ہماری افواج ہائی الرٹ پر ہیں۔ انہوں نے دعویٰ کیا کہ امریکہ کے پاس اس وقت دنیا کا جدید ترین اسلحہ، گولا بارود اور جنگی ساز و سامان موجود ہے جس کا کوئی مقابلہ نہیں کر سکتا۔صدر کا مزید کہنا تھا کہ دنیا بھر میں پھیلے ہوئے امریکی فوجی اڈے ہر قسم کے جدید ہتھیاروں سے لیس ہیں۔

ہماری صلاحیتیں کسی بھی ہنگامی صورتحال سے نمٹنے کے لیے کافی ہیں۔اگر ضرورت پڑی، تو ہم اپنے اس تمام فوجی اثاثے کو استعمال کرنے سے گریز نہیں کریں گے۔ایک سوال کے جواب میں صدر ٹرمپ نے یہ بھی تسلیم کیا کہ ایران نے حالیہ مذاکرات کے دوران کافی لچک کا مظاہرہ کیا ہے۔ تاہم، انہوں نے زور دیا کہ محض باتوں سے کام نہیں چلے گا، ایران کو اپنی پالیسیوں میں عملی تبدیلی لانی ہوگی۔تجزیہ کاروں کا کہنا ہے کہ صدر ٹرمپ کا یہ بیان ایک طرف ایران پر دباؤ بڑھانے کی کوشش ہے تو دوسری طرف یہ خطے میں امریکی عسکری غلبے کا واشگاف اعلان ہے۔ ابنائے ہرمز میں جاری کشیدگی اور صدر ٹرمپ کے اس بیان نے عالمی سطح پر تشویش کی لہر دوڑا دی ہے۔