انگلینڈ کے فاسٹ باؤلر اولی روبنسن کی قومی ٹیم میں واپسی کے لئے کوششیں تیز، ہیڈ کوچ سے رابطہ

منگل 5 مئی 2026 08:52

لندن (اُردو پوائنٹ اخبارتازہ ترین - اے پی پی۔ 05 مئی2026ء) انگلینڈ کے فاسٹ باؤلر اولی روبنسن نے ٹیسٹ ٹیم میں ممکنہ واپسی کے لئے ہیڈ کوچ برینڈن میکولم اور منیجنگ ڈائریکٹر راب کی سے رابطے تیز کر دئیے ہیں، جس کے بعد ان کی قومی ٹیم میں دوبارہ شمولیت کے امکانات بڑھ گئے ہیں۔برطانوی خبر رساں ادارے بی بی سی کے مطابق 32 سالہ اولی روبنسن نے جون 2021سے فروری 2024 کے درمیان 20 ٹیسٹ میچز میں شرکت کرتے ہوئے 76 وکٹیں حاصل کیں، تاہم فٹنس مسائل، خصوصاً کمر کی تکلیف، ان کے کیریئر میں بڑی رکاوٹ بنی۔

آسٹریلیا اور بھارت کے خلاف سیریز کے دوران انجری کے باعث ان کی کارکردگی متاثر رہی جبکہ بعد ازاں ٹیم مینجمنٹ کے ساتھ تعلقات میں بھی کشیدگی پیدا ہو گئی تھی۔اکتوبر 2024میں مرکزی معاہدہ ختم ہونے کے بعد اولی روبنسن قومی ٹیم سے باہر ہو گئے تھے، تاہم انہوں نے ڈومیسٹک کرکٹ میں عمدہ کارکردگی کے ذریعے دوبارہ توجہ حاصل کی ہے۔

(جاری ہے)

سسیکس کی نمائندگی کرتے ہوئے انہوں نے گزشتہ سیزن میں 10میچز میں 39 وکٹیں حاصل کیں جبکہ رواں سیزن میں بھی وہ 11 وکٹیں لے چکے ہیں اور ایک ناقابلِ شکست سنچری بھی سکور کی ہے۔

اولی روبنسن کا کہنا ہے کہ سیزن کے آغاز میں کوچ کی جانب سے انہیں پیغام ملا کہ ٹیم کے دروازے اب بھی کھلے ہیں جبکہ منیجنگ ڈائریکٹر راب کی نے بھی بہتر کارکردگی جاری رکھنے کی تلقین کی۔ ان کے مطابق یہ حوصلہ افزائی ان کی کارکردگی میں بہتری کا باعث بنی ہے۔انگلینڈ ٹیم کا اعلان مئی کے وسط میں متوقع ہے، جب نیوزی لینڈ کے خلاف سیریز کے لئے سکواڈ کا انتخاب کیا جائے گا۔

باؤلنگ لائن میں متعدد کھلاڑیوں کی عدم دستیابی اور انجریز کے باعث نئے مواقع پیدا ہو گئے ہیں، جس سے رابنسن کی واپسی کے امکانات مزید مضبوط ہو گئے ہیں۔ اولی روبنسن نے اپنے بیان میں کہا کہ اب ان کی پوری توجہ کرکٹ پر مرکوز ہے اور وہ پہلے سے زیادہ تیار اور پختہ کھلاڑی بن چکے ہیں۔ انہوں نے اس امید کا اظہار کیا کہ اگر موقع ملا تو وہ اپنی کارکردگی سے ٹیم کی توقعات پر پورا اتریں گے۔