وزیراعلیٰ خیبرپختونخواہ کا وفاق کیخلاف قلم چھوڑ ہڑتال کا اعلان، انتظامی امور ٹھپ کرنے کی دھمکی

جب تک وفاق اپنا رویہ درست نہیں کرتا اور عمران خان کو قانونی حقوق فراہم نہیں کیے جاتے، یہ احتجاج جاری رہے گا، سہیل آفریدی کا بیان

ساجد علی منگل 5 مئی 2026 16:53

وزیراعلیٰ خیبرپختونخواہ کا وفاق کیخلاف قلم چھوڑ ہڑتال کا اعلان، انتظامی ..

پشاور (اُردو پوائنٹ اخبارتازہ ترین۔ 05 مئی2026ء) خیبرپختونخواہ کی صوبائی حکومت نے وفاقی حکومت کی پالیسیوں اور بانی پی ٹی آئی عمران خان کے ساتھ روا رکھے جانے والے سلوک کے خلاف سخت احتجاجی قدم اٹھاتے ہوئے کل سے صوبہ بھر میں ’قلم چھوڑ ہڑتال‘ کا باقاعدہ اعلان کر دیا۔ تفصیلات کے مطابق وزیراعلیٰ خیبرپختونخواہ سہیل آفریدی نے وفاقی حکومت پر صوبے کے حقوق غصب کرنے اور سیاسی انتقام کا الزام عائد کرتے ہوئے کل سے تمام سرکاری دفاتر میں کام روکنے کا حکم دے دیا ہے، اس حوالے اپنے ایک بیان میں انہوں نے ہڑتال کے فیصلے کو وفاق کے امتیازی سلوک کا نتیجہ قرار دیا ہے۔

وزیراعلیٰ کا مؤقف ہے کہ وفاق کی جانب سے خیبرپختونخواہ کو این ایف سی ایوارڈ کے تحت اس کا جائز حصہ نہیں دیا جا رہا، بجلی کے خالص منافع اور گیس کی رائلٹی کے معاملات میں بھی صوبے کے ساتھ مسلسل ناانصافی برتی جا رہی ہے، جس سے صوبائی خزانہ شدید دباؤ کا شکار ہے۔

(جاری ہے)

سہیل آفریدی نے اڈیالہ جیل میں قید بانی پی ٹی آئی اور ان کی اہلیہ بشریٰ بی بی کے معاملے کو ہڑتال کا اہم جزو قرار دیتے ہوئے کہا کہ عمران خان کو ان کے ذاتی معالج کی نگرانی میں علاج کی سہولت فراہم نہیں کی جا رہی، ان کی اہلخانہ اور وکلاء سے ملاقاتوں پر پابندی غیر قانونی اور انسانی حقوق کی خلاف ورزی ہے، جس کے خلاف کل سے صوبے کے تمام سرکاری محکموں، سیکرٹریٹ اور ضلعی انتظامیہ کے دفاتر میں قلم چھوڑ ہڑتال ہوگی، جب تک وفاق اپنا رویہ درست نہیں کرتا اور بانی پی ٹی آئی کو قانونی حقوق فراہم نہیں کیے جاتے، یہ احتجاج جاری رہے گا۔