امریکہ نے سول کشتیوں کو نشانہ بنایا، یو اے ای پر حملے ردعمل تھا. پاسداران انقلاب

تہران (اردوپوائنٹ اخبارتازہ ترین-انٹرنیشنل پریس ایجنسی۔05 مئی ۔2026 ) پاسدارن انقلاب نے امریکا کی جانب سے ایرانی فوج کی تیز رفتار کشتیوں کو نشانہ بنائے جانے کی تردید کرتے ہوئے کہا ہے کہ یو اے ای پر حملے جوابی ردعمل تھا جبکہ ایرانی میڈیا کا کہنا ہے کہ آبنائے ہرمز میں ناکام آپریشن کے دوران امریکی فوجی حملے میں 5 شہری شہید ہو گئے. ایرانی میڈیا نے پاسدارن انقلاب کی جانب سے جاری بیان کے حوالے سے لکھا کہ امریکی فوج کی جانب سے ایرانی فوج کی تیز رفتار کشتیوں کو نشانہ بنانے کے بے بنیاد دعوے کے بعد پاسدارانِ انقلاب کے کسی بھی جنگی جہاز کو کوئی نقصان نہیں پہنچا اس خبر کی نوعیت جانچنے کے لیے مقامی ذرائع سے تحقیقات کی گئیں.

(جاری ہے)

تحقیقات سے یہ بات سامنے آئی کہ امریکی افواج نے عمان کے ساحل سے ایران کے ساحلوں کی جانب جانے والی عوامی سامان بردار دو چھوٹی کشتیوں پر حملہ اور فائرنگ کی اور انہیں نشانہ بنایا گیا جس کے نتیجے میں ان میں سوار پانچ عام شہری شہید ہو گئے. ترجمان پاسدارن انقلاب کے مطابق فجیرہ میں تیل تنصیبات پر حملے کا کوئی پہلے سے طے شدہ منصوبہ نہیں تھا، فجیرہ بندرگاہ پر جو کچھ ہوا وہ امریکی فوج کی مہم جوئی کا نتیجہ تھا ترجمان کے مطابق یو اے ای ایران پر حالیہ حملوں میں ملوث ہے، متحدہ عرب امارات کے خلاف کارروائی جوابی ردعمل تھا، مزید حملے ہوئے تو ایران اہم تنصیبات کو نشانہ بنائے گا.

دوسری جانب ایران کے سرکاری میڈیا کی رپورٹ کے مطابق گزشتہ روز آبنائے ہرمز میں امریکی فوج کی جانب سے جن 6 ایرانی کشتیوں کو نشانہ بنایا گیا، وہ پاسدارانِ انقلاب سے منسلک نہیں تھیں بلکہ سویلین کشتیاں تھیں جو سامان اور مسافروں کو لے جا رہی تھیں اس حملے میں 5 افراد شہیدہو گئے. ایرانی نشریاتی ادارے کو ایک فوجی اہلکار نے بتایا کہ امریکی رپورٹس کے بعد ایرانی حکام نے تحقیقات کیں، جن سے یہ بات سامنے آئی کہ امریکی افواج نے 2 چھوٹی مال بردار کشتیوں پر حملہ کیا اور فائرنگ کی، جو شہریوں کو لے کر عمان کے ساحل پر واقع خصب سے ایرانی ساحل کی جانب جا رہی تھیں.

فوجی اہلکار کے مطابق دشمن کا یہ عجلت پسند اور بھدا رویہ امریکی فوج کے اس شدید خوف اور ڈرانے خواب کا نتیجہ ہے جو پاسدارانِ انقلاب کی تیز رفتار کشتیوں کی کارروائیوں کے حوالے سے اسے لاحق ہے واضح رہے کہ پیر کے روز امریکی فوج نے دعوی کیا تھا کہ اس نے ایران کی 6 چھوٹی کشتیوں کو تباہ کر دیا اور ایران کی جانب سے داغے گئے کروز میزائلوں اور ڈرونز کو بھی مار گرایا امریکی سینٹرل کمانڈ کے سربراہ ایڈمرل بریڈ کوپر کے مطابق یہ کارروائیاں آبنائے ہرمز میں بحری آمد و رفت بحال کرنے کے لئے جاری آپریشن کے دوران کی گئیں.