Live Updates

برطانیہ ،فرانس اورجرمنی کی متحدہ عرب امارات پر ایرانی ڈرون اور میزائل حملے کی مذمت

یو اے ای پر ایرانی ڈرون حملے کی مذمت کرتے ہیں، ایران سفارتکاری کی طرف آئے. برطانوی وزیر اعظم حملے بلاجواز اور ناقابل قبول، خطے میں کشیدگی کے خاتمے اور استحکام کی بحالی کے لیے آزاد بحری آمدورفت ناگزیر ہے.فرانسیسی صدر

میاں محمد ندیم منگل 5 مئی 2026 17:33

برطانیہ ،فرانس اورجرمنی کی متحدہ عرب امارات پر ایرانی ڈرون اور میزائل ..

لندن/پیرس/برلن(اردوپوائنٹ اخبارتازہ ترین-انٹرنیشنل پریس ایجنسی۔05 مئی ۔2026 ) برطانیہ ،فرانس اورجرمنی نے متحدہ عرب امارات پر ایرانی ڈرون اور میزائل حملے کی مذمت کرتے ہوئے اسے بلاجواز اور ناقابلِ قبول قرار دیا اورایران سے کہا ہے کہ وہ سفارتکاری کی طرف آئے، آبنائے ہرمز کی ناکہ بندی ختم ہونی چاہئے،خطے میں کشیدگی کے خاتمے اور استحکام کی بحالی کے لیے آزاد بحری آمدورفت ناگزیر ہے.

عالمی ذرائع ابلاغ کے مطابق برطانوی وزیر اعظم کیئر اسٹارمر نے متحدہ عرب امارات پر ایرانی ڈرون اور میزائل حملے کی مذمت کی ہے اس حوالے سے انہوں نے کہا ہے کہ خطے میں کشیدگی بڑھنے سے بچنے کے لیے ایران سفارت کاری کی طرف آئے.

(جاری ہے)

کیئر اسٹارمر کا کہنا ہے کہ کشیدگی کو ختم ہونا چاہیے اور ایران کو بامقصد مذاکرات میں شامل ہونے کی ضرورت ہے برطانوی وزیر اعظم نے کہا ہے کہ گلف میں اپنے شراکت داروں کے دفاع کی حمایت جاری رکھیں گے ادھرفرانسیسی صدر ایمانویل میکخواں نے متحدہ عرب امارات کے خلاف ایرانی حملوں کی مذمت کرتے ہوئے انہیں بلاجواز اور ناقابلِ قبول قرار دیا ہے.

فرانسیسی صدر کی جانب سے یہ بیان ایک ایسے وقت میں سامنے آیا ہے کہ جب امارات نے اعلان کیا کہ امریکہ اسرائیل جنگ میں ایران کے ساتھ ہونے والی جنگ بندی کے نافذ ہونے کے بعد پہلی مرتبہ اسے میزائلوں اور ڈرون حملوں کا سامنا کرنا پڑا ہے صدر میکخواں نے”ایکس “پر جاری بیان میں کہا کہ امارات کی شہری تنصیبات کو نشانہ بنانے والے ایرانی حملے کسی بھی طور قابلِ قبول نہیں انہوں نے امارات اور خطے کے اتحادی ممالک کی اپنے علاقوں کے دفاع کے لیے فرانس کی حمایت کا اعادہ کیا.

فرانسیسی صدر نے اپنے بیان میں آبنائے ہرمز کو دوبارہ کھولنے کی ضرورت پر بھی زور دیتے ہوئے کہا کہ خطے میں کشیدگی کے خاتمے اور استحکام کی بحالی کے لیے آزاد بحری آمدورفت ناگزیر ہے دوسری جانب جرمن چانسلر نے بھی متحدہ عرب امارات پر حملے کی شدید مذمت کی جرمن چانسلر نے یو اے ای اور خطے کے شراکت داروں سے اظہارِ یکجہتی کیا، جرمن چانسلرنے ایکس پر جاری بیان میں کہا تہران مذاکرات کی میز پر واپس آئے، خطے اور دنیا کو یرغمال نہ بنائے انہوں نے کہا کہ آبنائے ہرمز کی ناکہ بندی ختم ہونی چاہئے، ایران کو ایٹمی ہتھیار بنانے کی اجازت نہیں دی جا سکتی، شراکت داروں کے خلاف مزید دھمکیاں اور حملے ناقابل قبول ہیں.