میئرکراچی الیکٹرک بائیک پر سندھ اسمبلی پہنچ گئے، پولیس والے کی دروازہ بند کرنے کی کوشش

جمعہ 8 مئی 2026 23:56

کراچی (اُردو پوائنٹ اخبارتازہ ترین - این این آئی۔ 08 مئی2026ء) میئر کراچی مرتضی وہاب الیکٹرک بائیک چلاکر سندھ اسمبلی پہنچ گئے، ایک پولیس والے نے عام آدمی سمجھ کر دروازہ بند کرنے کی کوشش کی، ساتھ آئے اہلکاروں نے گیٹ کھلوایا۔تفصیلات کے مطابق میئر کے ایم سی ہیڈ آفس سے میٹنگ کے لیے سندھ اسمبلی الیکٹرک بائیک پر پہنچے جس کی ویڈیو بھی جاری کی گئی ہے۔

(جاری ہے)

ویڈیو میں دیکھا جاسکتا ہے کہ وہ گیٹ پر پہنچے تو ایک پولیس والے نے انہیں پہچانا نہیں اور مرکزی دروازہ بند کرنے کی کوشش کی جس پر میئر کے ساتھ آئے اہلکاروں نے پولیس والے سے دروازہ کھلوایا۔صحافیوں نے ان سے پوچھا کہ کیا حافظ نعیم الرحمان کے ڈر سے آپ بائیک پر آئے ہیں اس پر میئر نے کہا کہ کسی سے ڈرتا نہیں ہوں، خوف صرف اللہ کی ذات کا ہے۔

انہوں نے کہا کہ کے ایم سی ملازمین کو 20 الیکٹرک بائیکس دی ہیں، ملازمین کو مزید الیکٹرک بائیکس دی جائیں گی، پہلی بار موٹر سائیکل چلائی ہے تاہم سائیکل چلاتا رہا ہوں۔انہوں نے کہا کہ میں موٹر سائیکل پر اسمبلی آیا اور واپس اپنی نجی گاڑی میں جا رہا ہوں،مجھ سے بائیک چلانے کے لائسنس کا سوال پوچھا گیا مجھے نہیں پتا موٹر سائیکل اور کار کے الگ الگ ڈرائیونگ لائسنس ہوتے ہیں۔