سندھ بھر میں ہیٹ ویو الرٹ، ریسکیو 1122 کے 25 سے زائد ہیٹ ریلیف کیمپس قائم

جمعہ 8 مئی 2026 23:55

کراچی(اُردو پوائنٹ اخبارتازہ ترین - این این آئی۔ 08 مئی2026ء) صوبائی ڈیزاسٹر مینجمنٹ اتھارٹی (PDMA) کی جانب سے جاری کردہ ہیٹ ویو الرٹ کے پیشِ نظر سندھ ایمرجنسی ریسکیو سروس ریسکیو 1122 نے ضلعی انتظامیہ اور دیگر متعلقہ اداروں کے تعاون سے صوبے بھر میں 25 سے زائد ہیٹ ریلیف کیمپس قائم کر دیے ہیں تاکہ شدید گرمی اور ہیٹ اسٹروک کے ممکنہ خطرات سے شہریوں کو بروقت تحفظ فراہم کیا جا سکے۔

مشیر وزیراعلی سندھ برائے بحالی گیان چند ایسرانی کی ہدایات پر کراچی، حیدرآباد، جامشورو، بدین، سجاول، ٹھٹھہ، لاڑکانہ، قمبر شہدادکوٹ، سکھر، گھوٹکی، جیکب آباد، تھرپارکر، میرپورخاص، شہید بینظیر آباد اور دیگر اضلاع میں قائم ان کیمپس سے روزانہ ایک ہزار سے زائد شہری مستفید ہو رہے ہیں۔

(جاری ہے)

گیانچند ایسرانی کے مطابق کراچی میں سخی حسن چورنگی، واٹر پمپ، ریلوے اسٹیشن، ڈی سی ساتھ کمپلیکس، گلستانِ جوہر، ملیر اور دیگر مصروف مقامات پر خصوصی ہیٹ ریلیف پوائنٹس قائم کیے گئے ہیں، جبکہ حیدرآباد میں نسیم نگر، عالمدار چوک اور ٹنڈوجام سمیت مختلف علاقوں میں بھی کیمپس فعال ہیں۔

اسی طرح سکھر کے گھنٹہ گھر، میرپور ماتھیلو، لاڑکانہ، مٹھی، بدین، سجاول، قمبر اور شہید بینظیر آباد میں بھی عوام کو فوری ریلیف فراہم کیا جا رہا ہے۔انہوں نے بتایا کہ ہیٹ ریلیف کیمپس پر شہریوں کو ٹھنڈا پانی، ORS، شربت، ابتدائی طبی امداد اور ہیٹ اسٹروک سے بچا سے متعلق آگاہی فراہم کی جا رہی ہے۔ شدید متاثرہ افراد کو فوری طبی امداد دینے کے ساتھ قریبی اسپتالوں میں منتقل کرنے کی سہولت بھی موجود ہے۔

مشیر وزیراعلی سندھ نے کہا کہ ان کی ہدایات پر تمام اضلاع میں فائر اینڈ ریسکیو، ایمرجنسی میڈیکل اور ایمبولینس ٹیموں کو ہائی الرٹ رکھا گیا ہے جبکہ سینٹرل کمانڈ اینڈ کنٹرول سینٹر مسلسل صورتحال کی نگرانی کر رہا ہے۔گیانچند ایسرانی نے شہریوں سے اپیل کی کہ غیر ضروری طور پر دھوپ میں نکلنے سے گریز کریں، زیادہ پانی استعمال کریں، بچوں اور بزرگوں کا خصوصی خیال رکھیں اور کسی بھی ہنگامی صورتحال میں فوری طور پر ریسکیو 1122 ہیلپ لائن سے رابطہ کریں۔