موٹروے گینگ ریپ کیس میںموت کی سزا پانے والے مجرموں کی اپیلیں سماعت کیلئے مقرر

جمعہ 8 مئی 2026 22:48

لاہور(اُردو پوائنٹ اخبارتازہ ترین - این این آئی۔ 08 مئی2026ء) لاہور ہائیکورٹ نے لاہور سیالکوٹ موٹر و ے گینگ ریپ کیس میں موت کی سزا پانے والے دو مجرموں کی اپیلیں سماعت کے لئے مقرر کر دیں۔لاہور ہائیکورٹ کے جسٹس سید شہباز علی رضوی اور جسٹس طارق محمود باجوہ پر مشتمل دو رکنی بنچ عابد ملہی اور شفقت بگا کی اپیلوں پر سماعت کرے گا۔

(جاری ہے)

تھانہ گوجر پورہ لاہور میں 9ستمبر 2020ء کو وقوعہ کا مقدمہ درج کیا گیاتھا،،مجرمان کے خلاف زیر دفعہ 365اے، 392، 7اے ٹی اے ، زیر دفعہ 427سمیت دیگر دفعات کے تحت مقدمہ درج ہوا ،انسدادِ دہشتگردی کورٹ نمبر ون لاہور نے دونوں مجرمان کو 20مارچ 2021ء کو زیادتی کے جرم میں سزائے موت کا حکم سنایا ۔

ٹرائل کورٹ نے مجرمان کو ڈکیتی میں 14سال قید اور ڈھائی لاکھ جرمانہ کا بھی حکم سنایا تھا ،،خاتون کے بچوں کو اغوا ء کرنے کے جرم میں عمر قید کی سزا سنائی گئی تھی ، متاثرہ خاتون کی گاڑی کو نقصان پہنچانے پر مجرمان کو پانچ سال کی سزا سنائی گئی تھی ،مجرمان نے انسدادِ دہشت گردی کے فیصلے کو 25مارچ 2021ء کو لاہور ہائیکورٹ میں چیلنج کیا تھا۔