اسلام آباد میں ’’بابر پارک‘‘ کا قیام، ازبکستان کا پاکستانی شہریوں کے لیے خوبصورت تحفہ، چیئرمین سی ڈی اے اور ازبک سفیر کی ملاقات

اسلام آباد اور تاشقند کو ’’سسٹر سٹیز‘‘ کا درجہ دینے کا فیصلہ، ڈپلومیٹک انکلیو میں ازبک سفارتخانے کی منتقلی پر بھی تبادلہ خیال

جمعہ 8 مئی 2026 21:10

` اسلام آباد(اُردو پوائنٹ اخبارتازہ ترین - آن لائن۔ 08 مئی2026ء) چیئرمین کیپٹل ڈویلپمنٹ اتھارٹی (سی ڈی ای) سہیل اشرف سے ازبکستان کے سفیر علیشر توختائف نے سی ڈی اے ہیڈکوارٹرز میں اہم ملاقات کی۔ ملاقات میں باہمی دلچسپی کے امور، دوطرفہ تعلقات کی مضبوطی اور اسلام آباد کی خوبصورتی میں اضافے کے منصوبوں پر تفصیلی تبادلہ خیال کیا گیا۔ملاقات کے دوران ازبک سفیر نے اسلام آباد کی ہریالی اور خوبصورتی کو سراہتے ہوئے بتایا کہ ازبکستان کی جانب سے پاکستانی شہریوں کے لیے فیصل ایونیو (سیکٹر F/7-1، پروین شاکر روڈ) کی گرین بیلٹ پر ’’بابر پارک‘‘ تعمیر کیا جا رہا ہے۔

انہوں نے تصدیق کی کہ اس منصوبے پر باقاعدہ کام شروع کر دیا گیا ہے اور یہ پارک اسلام آباد کے بہترین تفریحی مقامات میں سے ایک ہوگا۔

(جاری ہے)

چیئرمین سی ڈی اے نے پارک کے ڈیزائن کی تعریف کی اور جلد منصوبے کے دورے کا اعلان کیا۔ازبک سفیر نے انکشاف کیا کہ اسلام آباد اور تاشقند کو ’’سسٹر سٹیز‘‘ کا درجہ دینے کے لیے مفاہمت کی یاداشت (ایم او یو ) پر دستخط کی تقریب جلد متوقع ہے۔

اس کے علاوہ انہوں نے اسلام آباد اور ازبکستان کے تاریخی شہر فرغانہ کے مابین بھی سسٹر سٹی تعلقات قائم کرنے کی خواہش کا اظہار کیا۔ ملاقات میں ازبک سفارتخانے کو ڈپلومیٹک انکلیو میں منتقل کرنے کے امکانات پر بھی بات ہوئی، جس پر چیئرمین سی ڈی اے نے ہر ممکن تعاون کی یقین دہانی کرائی۔ چیئرمین سی ڈی اے سہیل اشرف نے کہا کہ پاکستان اپنے برادر ملک ازبکستان کے ساتھ تعلقات کو انتہائی قدر کی نگاہ سے دیکھتا ہے۔

انہوں نے مزید کہا کہ ہم اسلام آباد کی ترقی اور بیوٹفیکیشن کے لیے ازبکستان کے تجربات سے فائدہ اٹھانا چاہتے ہیں۔ اس موقع پر ازبک سفیر نے بھی دونوں ممالک کے طویل تاریخی اور ثقافتی رشتوں کا ذکر کرتے ہوئے کہا کہ اسلام آباد میں ’’تاشقند اسٹریٹ‘‘ کا قیام ان برادرانہ تعلقات کی ایک کڑی ہے۔ملاقات کے اختتام پر دونوں شخصیات نے شہری سطح پر تعاون کو مزید فروغ دینے اور اسلام آباد کے مختلف مقامات پر مل کر تزئین و آرائش کے کام کرنے کے عزم کا اعادہ کیا