Live Updates

پٹرول ڈیزل مزید مہنگا ہونے کے بعد مہنگائی کا نیا طوفان، ٹرانسپورٹ کرایوں میں 10 فیصد تک اضافہ

ٹرانسپورٹرز نے اخراجات میں اضافے کا جواز بنا کر کرائے بڑھا دیئے، اشیائے خوردونوش بھی مہنگی ہونے کا خدشہ

ساجد علی ہفتہ 9 مئی 2026 14:00

پٹرول ڈیزل مزید مہنگا ہونے کے بعد مہنگائی کا نیا طوفان، ٹرانسپورٹ کرایوں ..

لاہور (اُردو پوائنٹ اخبارتازہ ترین۔ 09 مئی2026ء) حکومت کی جانب سے پٹرول اور ڈیزل مزید مہنگا کیے جانے کے بعد ملک میں مہنگائی کا نیا طوفان، آگیا، ٹرانسپورٹ کرایوں میں بھی 10 فیصد تک اضافہ ہوگیا۔ تفصیلات کے مطابق حکومت کی جانب سے پٹرولیم مصنوعات کی قیمتوں میں حالیہ بڑے اضافے کے بعد ٹرانسپورٹ سیکٹر نے فوری ردعمل دیتے ہوئے کرایوں میں اضافے کا اعلان کیا ہے، جس نے مہنگائی کے مارے عوام کی کمر توڑ دی ہے۔

بتایا گیا ہے کہ وفاقی حکومت کی جانب سے پٹرول اور ڈیزل کی قیمتوں میں 15 روپے فی لٹر تک اضافے کے چند گھنٹوں بعد ہی ٹرانسپورٹرز نے بھی کرایوں میں بھاری اضافہ کر دیا ہے، جس کا اطلاق آج سے ہو چکا، ٹرانسپورٹرز نے اخراجات میں اضافے کا جواز بنا کر بین الصوبائی اور بین الاضلاعی بسوں کے کرایوں میں 5 فیصد تک اضافہ کر دیا گیا ہے، مال بردار گاڑیوں یعنی ٹرکوں اور ٹرالروں کے کرایوں میں 10 فیصد تک اضافہ کیا گیا ہے، جس کے باعث اشیائے خوردونوش کی قیمتوں میں مزید اضافے کا خدشہ پیدا ہو گیا۔

(جاری ہے)

بتایا جارہا ہے کہ لاہور، کراچی اور اسلام آباد سمیت مختلف شہروں کے لاری اڈوں پر مسافروں اور ٹرانسپورٹرز کے درمیان تکرار کے واقعات سامنے آ رہے ہیں، مسافروں کا کہنا ہے کہ حکومت کو قیمتیں بڑھانے سے پہلے ٹرانسپورٹ کے کرایوں کو ریگولیٹ کرنے کا میکانزم بنانا چاہیئے تاکہ ٹرانسپورٹرز اپنی مرضی کے نرخ وصول نہ کریں جب کہ دوسری جانب، ٹرانسپورٹرز کا مؤقف ہے کہ ڈیزل مہنگا ہونے کے بعد پرانے کرایوں پر گاڑیاں چلانا خسارے کا سودا ہے، اس لیے کرایوں میں اضافہ ناگزیر ہے۔