کینیا میں مسافر گاڑی پر مسلح افراد کا حملہ ،6 افراد ہلاک

اتوار 10 مئی 2026 08:59

اسلام آباد (اُردو پوائنٹ اخبارتازہ ترین - اے پی پی۔ 10 مئی2026ء) کینیا کے سرحدی علاقے میں مسافر گاڑی پر مسلح افراد کے حملے کے نتیجے میں کم از کم 6 افراد ہلاک جبکہ 10 زخمی ہوگئے۔شنہوا کے مطابق پولیس نے بتایا کہ یہ حملہ کینیا کے ضلع منڈیرا میں صومالیہ کی سرحد کے قریب پیش آیا، جہاں مشتبہ الشباب جنگجوؤں نے 14 نشستوں والی مسافر گاڑی کو نشانہ بنایا۔

حکام کا کہنا ہے کہ حملہ منڈیرا شہر سے تقریباً 8 کلومیٹر دور بیئر-اوایون گاؤں کے قریب دوپہر کے وقت ہوا، جب مسلح افراد نے گاڑی کو روک کر اندھا دھند فائرنگ کردی۔

(جاری ہے)

منڈیرا کاؤنٹی کے پولیس کمانڈر رابنسن اینڈیواکے مطابق گاڑی منڈیرا شہر سے عربیہ کے علاقے کی جانب جا رہی تھی اور مسافروں میں ایک ہی خاندان کے افراد شامل تھے، جو ایک مذہبی تقریب میں شرکت کے لیے سفر کر رہے تھے۔

پولیس نے واقعے کی تحقیقات شروع کر دی ہیں جبکہ سیکیورٹی اہلکار حملہ آوروں کی تلاش میں مصروف ہیں، جن کے بارے میں خیال ہے کہ وہ صومالیہ کی سرحد کی جانب فرار ہوگئے۔اگرچہ اب تک کسی گروپ نے حملے کی ذمہ داری قبول نہیں کی، تاہم سکیورٹی حکام کو شبہ ہے کہ کارروائی شدت پسند تنظیم الشباب نے کی ہے، جو اس سرحدی علاقے میں ماضی میں بھی متعدد حملوں میں ملوث رہی ہے۔