اداکار وجے نے وزات اعلیٰ کاحلف اٹھالیا، گھریلو صارفین کو مفت بجلی دینے کا حکم

تامل ناڈو میں خواتین کے تحفظ کے لیے سپیشل فورس بنانے اور انسداد منشیات کے حکم نامے پر بھی دستخط

اتوار 10 مئی 2026 17:10

اداکار وجے نے وزات اعلیٰ کاحلف اٹھالیا، گھریلو صارفین کو مفت بجلی دینے ..

چنئی(اُردو پوائنٹ اخبارتازہ ترین - این این آئی۔ 10 مئی2026ء) بھارتی اداکار سی جوزف وجے نے بھارتی ریاست تامل ناڈو کے وزیراعلیٰ کے طور پر حلف اٹھانے کے فوراً بعد گھریلو صارفین کو بجلی کے 200یونٹ مفت دینے کا اعلان کیا ہے۔بھارتی ٹی وی کے مطابق جوزف وجے چندرشیکھر کی پارٹی تملگا ویٹری کژگم (ٹی وی کی)اسمبلی میں اکثریتی جماعت بن کر ابھری ہے، نئے وزیراعلیٰ نے ریاست میں خواتین کے تحفظ کیلئے سپیشل فورس بنانے اور انسداد منشیات کے حکم نامے پر بھی دستخط کیے ہیں۔

حلف اٹھانے کے بعد چنئی میں جواہر لال نہرو سٹیڈیم میں پہلے خطاب میں ان کا کہنا تھا کہ حقیقی سکیولرازم اور سماجی انصاف کے لیے پرعزم حکومت کا ایک نیا دور اب شروع ہوا ہے، انہوں نے کانگریس، وی سی کے، آئی یو ایم ایل اور بائیں بازو کی جماعتوں کا شکریہ ادا کیا کہ انہوں نے حکومت بنانے کے لیے ان کی پارٹی کی حمایت کی۔

(جاری ہے)

جوزف وجے نے خصوصی طور پر جین زی کا شکریہ ادا کیا اور کہا کہ یہ ان کی وجہ سے ہے کہ ٹی وی کی جیت گئی کیونکہ انہوں نے اپنے خاندان والوں کو اس پارٹی کو ووٹ دینے پر قائل کیا، میں کسی شاہی گھرانے سے نہیں آیا، میں نے غربت اور بھوک کو قریب سے دیکھا ہے، لوگوں نے میرا مذاق اڑایا مگر آپ نے مجھے اپنے دل میں جگہ دی، جس پر میں شکرگزار ہوں۔

انہوں نے لوگوں کو مخاطب کرتے ہوئے کہا کہ میں بالکل آپ جیسا ہوں اور آپ میں سے ہی ایک ہوں، میں کوئی فرشتہ نہیں بلکہ عام آدمی ہوں۔واضح رہے کہ ریاستی انتخابات میں جوزف وجے کو ویدو ویدوتھلائی چیتروتھیگال کچی (وی سی کی) اورانڈین یونین مسلم لیگ نے ٹی وی کے کی حمایت کا اعلان کیا تھا جس کے بعد اتحاد کی نشستوں کی تعداد 234 رکنی اسمبلی میں 120 تک پہنچ گئیں۔اس سے قبل انڈین نیشنل کانگریس نے بھی وجے کی حکومت کی حمایت کی تھی، اس فیصلے کی ایک وجہ اداکار سے سیاست دان بننے والے وجے کے اپوزیشن لیڈر راہل گاندھی کے ساتھ دیرینہ تعلقات ہیں، دونوں کی پہلی ملاقات 2009 میں دہلی میں ہوئی تھی، جہاں مبینہ طور پر راہل گاندھی نے وجے کو یوتھ کانگریس میں شامل ہونے کی پیش کش کی تھی۔