سرائیکی ہیلپ لائن کی جانب سے فیلڈ مارشل سید عاصم منیر اور پاک افواج سے اظہارِ یکجہتی کے لیے ریلی اور ثقافتی جھومر کا انعقاد

سرائیکی برادری ہمیشہ پاکستان کی مسلح افواج کے شانہ بشانہ کھڑی رہی ہے اور قومی اتحاد و استحکام کے لیے اپنا کردار ادا کرتی رہے گی،اخترشاہین رند

اتوار 10 مئی 2026 17:20

کراچی(اُردو پوائنٹ اخبارتازہ ترین - این این آئی۔ 10 مئی2026ء) سرائیکی ہیلپ لائن کراچی کی جانب سے ہفتہ کے روز کراچی پریس کلب کے باہر فیلڈ مارشل سید عاصم منیر اور پاکستان کی مسلح افواج سے اظہارِ یکجہتی کے لیے ایک ریلی اور ثقافتی تقریب کا انعقاد کیا گیا۔ اس موقع پر ملکی سلامتی، قیادت، قربانیوں اور دفاع وطن کے لیے پاک افواج کے کردار کو بھرپور خراجِ تحسین پیش کیا گیا۔

اس تقریب کی قیادت سرائیکی ہیلپ لائن کراچی کے بانی اختر شاہین رند نے کی، جبکہ نوجوان کارکنوں، سماجی شخصیات اور سرائیکی برادری کے افراد نے بھرپور شرکت کی۔ شرکاء نے فیلڈ مارشل سید عاصم منیر کی تصاویر اور بینرز اٹھا رکھے تھے، حب الوطنی کے نعرے لگائے اور پاکستان کی مسلح افواج کے ساتھ مکمل یکجہتی کا اظہار کیا۔

(جاری ہے)

تقریب کا خصوصی حصہ روایتی سرائیکی ثقافتی جھومر تھا، جس نے حب الوطنی، اتحاد اور سرائیکی ثقافت کی خوبصورت عکاسی کی۔

منتظمین کے مطابق اس تقریب کا مقصد قومی یکجہتی کا پیغام دینا، پاک افواج کو خراجِ تحسین پیش کرنا اور ملک کی خودمختاری و استحکام کے لیے قیادت کے ساتھ اظہارِ حمایت کرنا تھا۔ اس موقع پر خطاب کرتے ہوئے اختر شاہین رند نے کہا کہ سرائیکی برادری ہمیشہ پاکستان کی مسلح افواج کے شانہ بشانہ کھڑی رہی ہے اور قومی اتحاد و استحکام کے لیے اپنا کردار ادا کرتی رہے گی۔

انہوں نے کہا کہ وطن کے دفاع اور سلامتی کے لیے پاک افواج کی قربانیاں پوری قوم کے لیے باعثِ فخر ہیں۔ تقریب میں ایم آر دشتی، کاشف ڈی کے، بشیر احمد، محمد اصغر، راشد عزیز بھٹہ، خورشید پہوڑ، انور بھٹہ، آصف مہر، رحمان بھٹہ، عابد رند، مبین رند، شاہد چانڈیہ، فیضان ارشاد، سعید احمد، اختر آرائیں، رمضان خلیفہ، شاہد عباسی، خالد سندیلا، نادر ملک، غلام شبیر رند، دانش جہانزیب، وسیم، جام عارف، عاصم، فیصل ملک، فراز، افضل سخی سولنگی، اور رئیس آصف سمیت دیگر نوجوان کارکنوں اور سرائیکی برادری کے افراد نے شرکت کی۔