روز روز کے چالان سے تنگ رکشہ ڈرائیور نے بیوی سمیت خود کشی کرلی

چالانز کے باعث آمدن میں کمی سے میاں بیوی میں جھگڑے شروع ہوئے، خودکشی سے قبل بھی جھگڑا ہوا تھا

ساجد علی اتوار 10 مئی 2026 18:12

روز روز کے چالان سے تنگ رکشہ ڈرائیور نے بیوی سمیت خود کشی کرلی

چیچہ وطنی(اُردو پوائنٹ اخبارتازہ ترین۔ 10 مئی2026ء) صوبہ پنجاب کے علاقہ چیچہ وطنی میں بار بار چالان اور جرمانے سے دلبر داشته ہوکر رکشہ ڈرائیور نے بیوی سمیت خود کشی کرلی۔ تفصیلات کے مطابق یہ افسوسناک واقعہ چیچہ وطنی کے نواحی چک 39 بارہ ایل میں پیش آیا جہاں رکشہ ڈرائیور عمران 34 سالہ اور اس کی بیوی ثمرین 23 سالہ نے مالی پریشانیوں سے تنگ آکر زہر کھا کر خود کشی کر لی۔

معلوم ہوا ہے کہ عمران رکشہ چلا کر گزر اوقات کرتا تھا لیکن ٹریفک پولیس کے طرف سے بار بار چالان اور جرمانوں سے تنگ آچکا تھا اور گھر واپس رقم لے کر نہ آتا جس پر میاں بیوی میں جھگڑا ہونے لگا، خود کشی سے قبل بھی جھگڑا ہوا اور دونوں نے مل کر اجتماعی خود کشی کر لی، پولیس صدر چیچہ وطنی نے لاشوں کو پوسٹ مارٹم کے بعد ورثا کے سپر د کر دیا۔

(جاری ہے)

دوسری طرف ساہیوال میں دو روز قبل نہر لوئر باری دواب ایل بی ڈی سی نہر میں ڈوبنے والے ماں اور بیٹے کی لاشیں مل گئیں، ریسکیو نے لاشوں کو نہر سے نکال کر ورثاء کے حوالے کر دیا، یہ واقعہ اس وقت پیش آیا جب سات سالہ احمد نہر کنارے کھیل رہا تھا کہ پاوں پھسلنے سے نہر میں گر گیا، بیٹے کو بچانے کے لئے 33 سالہ عالیہ نے بھی نہر میں چھلانگ لگادی۔

علاوہ ازیں ساہیوال کے نواحی گاؤں 55 جی ڈی میں 18 سالہ لڑکی نے مبینہ طور پر خود کو گولی مار کر زندگی کا خاتمہ کر لیا، لڑکی کے والد نے 15 پر کال کرکے پولیس کو خود کشی کے واقعہ کی اطلاع دی، پولیس نور شاہ نے موقع پر پہنچ کر تفتیش شروع کردی اور ضروری کاروائی کے بعد لاش کو ورثاء کے حوالے کر دیا گیا۔