کھیلوں کے فروغ کی جانب ایک اہم سنگِ میل، سرگودھا میں پہلی رولر اسکیٹنگ اکیڈمی کا افتتاح کر دیا گیا

اتوار 10 مئی 2026 19:03

سرگودھا (اُردو پوائنٹ اخبارتازہ ترین - اے پی پی۔ 10 مئی2026ء) سرگودھا میں پہلی رولر اسکیٹنگ اکیڈمی کا افتتاح کر دیا گیا ہے ۔ سرگودھا شہر میں کھیلوں کے فروغ کی جانب ایک اہم سنگِ میل عبور کرتے ہوئے شہر کی پہلی رولر اسکیٹنگ اکیڈمی کا باقاعدہ افتتاح کمپنی باغ جوائے لینڈ میں کر دیا گیا ہے ۔

(جاری ہے)

اکیڈمی کی افتتاحی تقریب میں پاکستان مسلم لیگ (ن) کی ممبر قومی اسمبلی ارم حامد حمید، ریجنل سپورٹس آفیسر رانا نذیر انجم، ڈسٹرکٹ سپورٹس آفیسر سرگودھا صائمہ منظور،اسسٹنٹ سپورٹس آفیسرمحمد طیب، کوآرڈینیٹررولراسکیٹنگ اکیڈمی محمد ظہور گجر، وائس چیئرمین انٹرنیشنل ہیومن رائٹس موومنٹ ظفر گوندل، ممبر ایگزیکٹو کمیٹی ورلڈمیڈیاسیل پاکستان طارق منہاس سمیت سماجی و سیاسی شخصیات، صحافیوں اور سپورٹس سے وابستہ افراد نے شرکت کی۔

تقریب کے شرکاء نے اس اقدام کو نوجوان نسل کے لیےمثبت سرگرمی قرار دیتے ہوئے کہا کہ ایسی اکیڈمیز نوجوانوں کی صلاحیتوں کو نکھارنے اور صحتمند معاشرے کے قیام میں اہم کردار ادا کرتی ہیں۔ کمپنی باغ فیملی جوائے لینڈ میں قائم یہ اکیڈمی سرگودھا کی پہلی رولر اسکیٹنگ اکیڈمی ہے، جہاں نوجوانوں اور بچوں کو جدید انداز میں اسکیٹنگ کی تربیت فراہم کی جائے گی۔