ریٹائرمنٹ لینے کے بعد شبنم اسماعیل کی جنوبی افریقی ویمنز ٹیم میں واپسی

ٹیم کی قیادت لورا وولوارڈٹ کریں گی، تجربہ کار آل راؤنڈر ماریزان کیپ بھی بیماری سے صحت یاب ہوکر اسکواڈ میں شامل

بدھ 13 مئی 2026 12:44

ریٹائرمنٹ لینے کے بعد شبنم اسماعیل کی جنوبی افریقی ویمنز ٹیم میں واپسی

مانچسٹر(اُردو پوائنٹ اخبارتازہ ترین - این این آئی۔ 13 مئی2026ء) جنوبی افریقا اپنی ورلڈ کپ مہم کا آغاز 13 جون کو مانچسٹر میں آسٹریلیا کے خلاف میچ سے کرے گاجنوبی افریقا نے ویمنز ٹی ٹوئنٹی ورلڈ کپ کے لیے مضبوط اسکواڈ کا اعلان کر دیا ہے جس میں 37 سالہ تجربہ کار فاسٹ بولر شبنم اسماعیل کی حیران کن واپسی سب کی توجہ کا مرکز بن گئی ہے۔ شبنم اسماعیل نے 2023 میں انٹرنیشنل کرکٹ سے ریٹائرمنٹ لے لی تھی تاہم اب وہ ایک بار پھر قومی ٹیم کی نمائندگی کرتی نظر آئیں گی۔

میڈیا رپورٹ کے مطابق ٹیم کی قیادت لورا وولوارڈٹ کریں گی جبکہ تجربہ کار آل راؤنڈر ماریزان کیپ بھی بیماری سے صحت یاب ہونے کے بعد اسکواڈ میں شامل ہو گئی ہیں۔ سابق کپتان ڈین وین نیکرک، جنہوں نے گزشتہ برس ریٹائرمنٹ واپس لینے کے بعد دوبارہ انٹرنیشنل کرکٹ کا آغاز کیا تھا، وہ بھی ورلڈ کپ اسکواڈ کا حصہ ہیں۔

(جاری ہے)

جنوبی افریقی اسکواڈ میں تزمین برٹس، سونے لوس، چلوئی ٹرائیون اور ایابونگا خاکا جیسے اہم کھلاڑی بھی شامل ہیں۔

نوجوان آل راؤنڈر کیلا رینیکے پہلی مرتبہ سینئر ورلڈ کپ کھیلیں گی جبکہ وکٹ کیپر بیٹر کرابو میسو بھی انجری سے صحت یاب ہو کر ٹیم میں واپس آگئی ہیں۔ہیڈ کوچ منڈلا ماشیمبی نے شابنم اسماعیل کی واپسی کو ٹیم کے لیے بڑی تقویت قرار دیتے ہوئے کہا کہ ان کے تجربے اور جذبے سے ٹیم کو فائدہ ہوگا۔ انہوں نے کہا کہ شبنم اب بھی جنوبی افریقا کے لیے کچھ خاص کرنے کی بھرپور خواہش رکھتی ہیں۔

شبنم اسماعیل ریٹائرمنٹ کے بعد بھی دنیا بھر کی فرنچائز لیگز میں متحرک رہیں۔ وہ 2025 میں ممبئی انڈینز کے ساتھ ویمنز پریمیئر لیگ جیت چکی ہیں جبکہ ڈبلیو بی بی ایل، دی ہنڈرڈ اور ویمنز کیریبین پریمیئر لیگ سمیت مختلف ایونٹس میں 92 ٹی ٹوئنٹی میچز کھیل چکی ہیں۔سلیکٹرز کے کنوینر کلنٹن ڈو پریز نے کہا کہ ٹیم کے بنیادی ڈھانچے کو برقرار رکھنا ضروری تھا کیونکہ یہی کھلاڑی گزشتہ چند برسوں سے ایک مضبوط یونٹ کے طور پر کھیل رہے ہیں۔جنوبی افریقا اپنی ورلڈ کپ مہم کا آغاز 13 جون کو مانچسٹر میں آسٹریلیا کے خلاف میچ سے کرے گا۔