ٹی ٹوئنٹی ورلڈ کپ میں عدم شرکت ، بنگلا دیشی حکومت نے تحقیقاتی کمیٹی قائم کر دی

بدھ 13 مئی 2026 12:44

ڈھاکہ (اُردو پوائنٹ اخبارتازہ ترین - این این آئی۔ 13 مئی2026ء) بنگلا دیش کی حکومت نیرواں سال ٹی ٹوئنٹی ورلڈ کپ میں شرکت نہ کرنے کے معاملے کی تحقیقات کیلئے اعلیٰ سطحی کمیٹی قائم کر دی ہے۔ اس فیصلے کے نتیجے میں بنگلا دیشی ٹیم کو شیڈول ایونٹ سے باہر کر دیا گیا تھاجبکہ اس کی جگہ اسکاٹ لینڈ کو ٹورنامنٹ میں شامل کیا گیا۔میڈیا رپورٹ کے مطابق بنگلا دیشی وزارتِ کھیل کی جانب سے جاری اعلامیے میں کہا گیا کہ ایڈیشنل سیکریٹری ڈاکٹر اے کے ایم ولی اللہ کمیٹی کی سربراہی کریں گے جبکہ سابق کپتان اور چیف سلیکٹر حبیب البشار اور فیصل دستگیر بھی کمیٹی کا حصہ ہوں گے۔

کمیٹی کو ہدایت کی گئی ہے کہ وہ 15 ورکنگ دنوں میں اپنی رپورٹ حکومت کو پیش کرے،معاملے کی ابتدا 3 جنوری کو اس وقت ہوئی جب بھارتی کرکٹ بورڈ (بی سی سی آئی) نے کولکتہ نائٹ رائیڈرز کو ہدایت دی کہ وہ بنگلا دیشی فاسٹ بولر مستفیض الرحمان کو آئی پی ایل 2026 اسکواڈ سے نکال دیں۔

(جاری ہے)

اس فیصلے کی باضابطہ وجہ سامنے نہیں لائی گئی، تاہم اس وقت بھارت اور بنگلا دیش کے تعلقات کشیدہ تھے۔

اگلے ہی روز اُس وقت کے اسپورٹس ایڈوائزر آصف نذرال نے اپنے فیس بک بیان میں کہا کہ بنگلا دیشی ٹیم بھارت میں خود کو محفوظ محسوس نہیں کرتی، لہٰذا آئی سی سی سے مطالبہ کیا جائے گا کہ ٹیم کے میچز سری لنکا منتقل کیے جائیں۔بعد ازاں بنگلا دیش کرکٹ بورڈ نے آئی سی سی کو آگاہ کیا کہ ٹیم بھارت میں نہیں کھیلے گی، تاہم آئی سی سی نے مؤقف اختیار کیا کہ کوئی سنجیدہ سیکیورٹی خدشات موجود نہیں۔

کئی ملاقاتوں اور آئی سی سی وفد کے دورہ ڈھاکا کے باوجود معاملہ حل نہ ہو سکا۔24 جنوری کو آئی سی سی بورڈ اجلاس میں بنگلا دیش کا مطالبہ مسترد کرتے ہوئے ٹیم کو ٹورنامنٹ سے باہر کر دیا گیا۔ بعد میں آصف نذرال نے اپنے فیصلے سے لاتعلقی ظاہر کرتے ہوئے ذمہ داری کھلاڑیوں پر ڈال دی۔نئی حکومت کے وزیر کھیل امین الحق نے کہا کہ بھارت کے ساتھ کھیلوں کے تعلقات بہتر بنائے جائیں گے اور پورے معاملے کی شفاف تحقیقات کرائی جائیں گی۔