بیٹیوں کو پہلی بار موبائل فون نکاح کے بعد لا کر دیا،شاہد آفریدی کا ایک انٹرویو میں انکشاف

بدھ 13 مئی 2026 12:44

کراچی(اُردو پوائنٹ اخبارتازہ ترین - این این آئی۔ 13 مئی2026ء) پاکستان کرکٹ ٹیم کے سابق کپتان شاہد آفریدی نے انکشاف کیا ہے کہبیٹیوں کو پہلی بار موبائل فون نکاح کے بعد لا کر دیا۔پاکستان کرکٹ ٹیم کے سابق کپتان شاہد آفریدی نے کراچی میں ہونے والی ایک تقریب میں خطاب کرتے ہوئے دینی اور دنیاوی تعلیم کی اہمیت پر گفتگو کی۔انہوںنے کہاکہ والدین عموماً بہت کم عمری میں، یعنی ڈھائی سے تین سال کے بچوں کو اسکولوں کے حوالے کر دیتے ہیں جو ان کے مطابق ایک بڑی غلطی ہے۔

سابق آل رائونڈر کپتان نے کہا کہ وہ خود بھی اس غلطی کا اعتراف کرتے ہیں تاہم اب ان کا موقف ہے کہ بچوں کی 5 سال کی عمر تک بنیادی تربیت گھر میں ہونا انتہائی ضروری ہے اور اس حوالے سے ماں باپ سے بہتر کوئی استاد نہیں ہو سکتا۔

(جاری ہے)

شاہد آفریدی نے موجودہ دور میں والدین کی اہم غلطی کی نشاندہی کرتے ہوئے کہا کہ آج کے دور میں والدین بچوں کو خاموش کرانے کیلئے موبائل فون دے دیتے ہیں، جو غلط ہے،والدین کو اپنی اولاد کو اس عادت سے دور رکھنا چاہیے۔سابق کپتان نے انکشاف کیا کہ انہوں نے اپنی بیٹیوں کو پہلی بار موبائل فون ان کے نکاح کے بعد لا کر دیا۔واضح رہے کہ شاہد آفریدی کی دو بڑی صاحبزادیوں کی شادی ہو چکی ہے اور ون ڈے ٹیم کے موجودہ کپتان شاہین شاہ آفریدی ان کے داماد ہیں۔