انمول پنکی نے گرفتاری سے پہلے اپنے ہاتھ خود ہی تیزاب سے جلا ڈالے، ملزمہ پر 15 مقدمات درج

ملزمہ نے اپنی شناخت چھپانے کیلئے ہاتھوں کی جلد اور نشانات کو تیزاب سے ختم کرنے کی کوشش کی تاکہ اس کے بارے میں کسی بھی قسم کے فرانزک شواہد حاصل نہ کیے جاسکیں

ساجد علی جمعرات 14 مئی 2026 11:47

انمول پنکی نے گرفتاری سے پہلے اپنے ہاتھ خود ہی تیزاب سے جلا ڈالے، ملزمہ ..

کراچی (اُردو پوائنٹ اخبارتازہ ترین۔ 14 مئی2026ء) منشیات کی دنیا میں "کوکین کوئین" کے نام سے مشہور ملزمہ انمول عرف پنکی کے حوالے سے مزید حیرت انگیز اور تہلکہ خیز تفصیلات سامنے آئے ہیں، ملزمہ کے خلاف کراچی اور لاہور میں منشیات، منی لانڈرنگ اور دیگر سنگین جرائم کے تقریباً 15 مقدمات درج ہیں۔ میڈیا رپورٹس کے مطابق گرفتاری سے قبل ملزمہ نے خود ہی اپنے ہاتھ تیزاب سے جلا دیئے، گرفتاری سے پہلے ملزمہ نے اپنی شناخت چھپانے کیلئے ہاتھوں کی جلد اور نشانات کو تیزاب سے ختم کرنے کی کوشش کی تاکہ اس کے بارے میں کسی بھی قسم کے فرانزک شواہد حاصل نہ کیے جاسکیں۔

بتایا گیا ہے کہ ملزمہ نے لاہور اور کراچی میں منشیات کی تیاری کے لیے الگ الگ خفیہ لیبارٹریاں قائم کر رکھی تھیں، منشیات کی بڑی مقدار لاہور میں تیار کی جاتی تھی، جبکہ کراچی میں اس کا نیٹ ورک زیادہ متحرک تھا، ملزمہ نئی تیار ہونے والی کوکین کو سب سے پہلے خود استعمال کر کے اس کا معیار چیک کرتی تھی، جس کے بعد پیکنگ اور سپلائی شروع کی جاتی تھی۔

(جاری ہے)

بتایا جارہا ہے کہ وہ اپنی تیار کردہ مہنگی ترین کوکین کو "گولڈ" کا نام دیتی تھی اور اسے خصوصی پیکنگ میں فروخت کیا جاتا تھا، چھاپے کے دوران ایسی ڈبیاں بھی ملیں جن پر انگریزی میں "کوئن میڈم پنکی ڈان" درج تھا، ملزمہ کو ریڈ وائن کا شوق تھا، جس کے لیے اس نے مبینہ طور پر 5 لاکھ روپے کے انگور منگوا کر خود کشید کرکے وائن تیار کی تھی، تفتیش میں یہ عجیب انکشاف بھی ہوا کہ وہ روزانہ لاکھوں روپے خیرات کرتی تھی، ایک واقعے میں اس نے مبینہ طور پر ایک فقیر کو 70 لاکھ روپے تک دیئے تھے۔

معلوم ہوا ہے کہ انمول پنکی کا کرمنل ریکارڈ گارڈن تھانے میں درج ہے، پولیس نے کوکین برآمدگی کیس میں ملزمہ کا سی آر او دو مقدمات کی بنیاد پر تیار کرلیا، ناجائز اسلحہ اور منشیات کے مقدمات کو کمپیوٹرائزڈ کرمنل ریکارڈ کا حصہ بنایا گیا، ریکارڈ میں ملزمہ کے فنگر پرنٹس اور نئی تصاویر بھی شامل ہیں، کمپیوٹرائزڈ کرمنل ریکارڈ میں ملزمہ انمول پنکی کا نادرا ڈیٹا بھی منسلک ہے، ملزمہ پنکی کے شناختی کارڈ پر ابوالحسن اصفہانی روڈ پر قائم اے ون کمپلیکس کا پتہ درج ہے۔