سی ٹی ڈی، ایس آئی یو کی کارروائی 6، کلو سے زائد ہیروئن برآمد، ایک ملزم گرفتار

جمعرات 14 مئی 2026 13:50

کراچی (اُردو پوائنٹ اخبارتازہ ترین - اے پی پی۔ 14 مئی2026ء) محکمہ انسداد دہشت گردی (سی ٹی ڈی) نے سپیشل انویسٹیگیشن یونٹ (ایس ایس یو) سی آئی اے پولیس کراچی کے ہمراہ مشترکہ کارروائی کرتے ہوئے بین الصوبائی منشیات فروش گروہ کے ایک رکن کو گرفتار کر کے قبضے سے 6 کلو 500 گرام ہیروئن برآمد کرلی۔

(جاری ہے)

ایس ایس پی ایس آئی یو ڈاکٹر سمیع اللہ سومرو کے مطابق گرفتار منشیات فروش کی شناخت محمد ارمان ولد محمد نظام کے نام سے ہوئی ہے، جس کو مشترکہ کارروائی کے دوران ضلع غربی کے علاقے رئیس امروہی کالونی سے گرفتار کیا گیا ہے۔

ایس ایس پی نے مزید بتایا کہ گرفتار ملزم حکمت گل نامی بدنام زمانہ بین الصوبائی نارکوٹکس نیٹ ورک کا رکن ہے مزکورہ نیٹ ورک دوسرے صوبوں سے منشیات کی بڑی مقدار میں کراچی پہنچاتا ہے اور مختلف مقامی صارفین کو ان کی سپلائی کرتا ہے۔ گرفتار ملزم بلوچستان سے منگوائی گئی منشیات شہر کے مختلف مقامات پر سپلائی کرنے جا رہا تھا۔ گرفتار ملزم کے خلاف مقدمہ درج کرکے تفتیش کی جارہی ہے۔