پاکستان آنے والے دنوں میں ملک خود ویکسین تیار کرنے کے قابل ہو جائے گا، وفاقی وزارت صحت

جمعرات 14 مئی 2026 17:54

اسلام آباد (اُردو پوائنٹ اخبارتازہ ترین - اے پی پی۔ 14 مئی2026ء) وفاقی وزارتِ صحت کے حکام نے کہا ہے کہ قومی ویکسین پالیسی کی منظوری ملکی تاریخ کا ایک اہم سنگِ میل ہے جس کے بعد پاکستان کو مقامی سطح پر ویکسین تیار کرنے کا باقاعدہ اختیار حاصل ہو گیا ہے۔ حکام کے مطابق پاکستان مقامی سطح پر ویکسین سازی کے فروغ کے لئے پرعزم ہے اور آنے والے دنوں میں ملک خود ویکسین تیار کرنے کے قابل ہو جائے گا۔

اس سلسلے میں منعقدہ ایک اہم اجلاس میں ٹریک اینڈ ٹریس سسٹم کے تحت 2D بارکوڈ کے نفاذ پر ہونے والی پیشرفت کا تفصیلی جائزہ لیا گیا۔ اجلاس میں ڈرگ ریگولیٹری اتھارٹی آف پاکستان (ڈریپ) کی جانب سے جاری آٹومیشن اقدامات کا بھی معائنہ کیا گیا۔اجلاس میں قومی ویکسین پالیسی کی منظوری کے بعد آئندہ کے لائحہ عمل، انڈونیشیا کے ساتھ مفاہمتی یادداشت پر پیشرفت اور نیشنل ریگولیٹری سسٹم کے لئے گلوبل بنچ مارکنگ سے متعلق اقدامات کا بھی جائزہ لیا گیا۔

(جاری ہے)

حکام نے بتایا کہ وفاقی وزیر صحت سید مصطفیٰ کمال ڈبلیو ایچ او کے گلوبل بنچ مارکنگ سسٹم کے مؤثر نفاذ کے لئے صوبائی حکومتوں کے ساتھ خود رابطہ اور کوآرڈینیشن کریں گے۔ ڈریپ میں جاری اصلاحات کے مثبت نتائج سامنے آ رہے ہیں اور ادارے کو عالمی معیار کے مطابق ایک مؤثر ریگولیٹری اتھارٹی بنانے کے لئے اصلاحاتی اقدامات تیز کئے جا رہے ہیں۔وفاقی وزیر صحت سید مصطفیٰ کمال نے ہدایت کی کہ ڈریپ ڈبلیو ایچ او کے لیول تھری اسٹیٹس کے حصول کے لئے تمام ضروری اقدامات میں مزید تیزی لائے۔

انہوں نے کہا کہ اس پیشرفت کے بعد پاکستانی ادویات کو دنیا کے 150 ممالک تک رسائی حاصل ہو سکے گی جبکہ اس وقت پاکستان کی ادویات 51 ممالک کو برآمد کی جا رہی ہیں۔ ان اقدامات سے نہ صرف ادویات کی برآمدات میں نمایاں اضافہ ہوگا بلکہ ملکی معیشت بھی مزید مضبوط ہوگی۔ \395