انمول پنکی سکینڈلز کی ابتدا ہے، آگے آگے دیکھیں ہوتا ہے کیا، فیصل واوڈا

انتظار ہے منشیات فروش پنکی کو کب تمغہ دیا جائے گا، اب تو وہ بھی تمغے کی حق دار ہوگئی؛ آزاد سینیٹر کا بیان

ساجد علی جمعرات 14 مئی 2026 16:31

انمول پنکی سکینڈلز کی ابتدا ہے، آگے آگے دیکھیں ہوتا ہے کیا، فیصل واوڈا

اسلام آباد (اُردو پوائنٹ اخبارتازہ ترین۔ 14 مئی2026ء) اسٹیبلشمنٹ کے قریب سمجھے جانے والے آزاد سینیٹر فیصل واوڈا کا کہنا ہے کہ انمول پنکی سکینڈلز کی ابتدا ہے، آگے آگے دیکھیں ہوتا ہے کیا۔ اس حوالے سے سوشل میڈیا پلیٹ فارم ایکس پر اپنے ایک بیان میں سابق وفاقی وزیر فیصل واوڈا نے منشیات فروش انمول عرف پنکی کے کیس کو بنیاد بنا کر ملک کے موجودہ سیاسی ڈھانچے اور حکمرانوں کو شدید تنقید کا نشانہ بنایا، انہوں نے اپنے بیان میں طنزیہ انداز اختیار کرتے ہوئے کہا کہ اب وہ وقت دور نہیں جب اس منشیات فروش کو بھی کوئی سرکاری اعزاز یا تمغہ دے دیا جائے۔

انہوں نے ملک کے جمہوری تسلسل اور حکمران طبقے پر سوالات اٹھاتے ہوئے کہا کہ قیامِ پاکستان سے اب تک ایسے ہی 'پنکی حکمران' جمہوری لبادے میں ملک پر قابض رہے ہیں جنہوں نے منشیات فروشوں کو تحفظ فراہم کیا، ان حکمرانوں نے پاکستان کے بچوں اور آنے والی نسلوں کا مستقبل داؤ پر لگا دیا ہے، جب تک ان 'پنکی حکمرانوں' کا کڑا احتساب نہیں ہوگا، یہ 'جمہوری ڈرامہ' اسی طرح چلتا رہے گا۔

(جاری ہے)

Tweets by FaisalVawdaPAK

فیصل واوڈا نے حکومت کے طریقہ کار کو ہدف بناتے ہوئے نکات اٹھائے کہ جمہوری فیصلوں کے بجائے بیوروکریٹس سے فیصلے کرانے اور جھوٹے بیانیے بنانے سے ملک ترقی نہیں کر سکتا، جھوٹے الزامات لگانے سے، اپنی نا اہلی چھپانے سے، پوسٹر چپکانے سے، جھوٹے بیانئے بنانے سے، جہاز اڑانے سے اور زبردستی کے جلسے کرانے سے یہ ملک آگے نہیں بڑھ سکتا۔ اپنے بیان کے اختتام پر انہوں نے ایک شعر کے مصرعوں میں تبدیلی کرتے ہوئے خبردار کیا کہ "یہ تو ابتداء ہے اسکینڈلز کی روتا ہے کیا، آگے آگے دیکھیے اسکینڈلز سے ہوتا ہے کیا"۔