Live Updates

حکمران ریلوے ،پی آئی اے ،سٹیل مل کی تباہی کے بعد محکمہ تعلیم پر نظریں گاڑھے ہوئے ہیں‘ اختر ڈار

تعلیم کو 90دن تک محدود کر کے ملک کی کون سی خدمت کی جارہی ہے ‘ چیئرمین تحریک انصاف نظریاتی

جمعہ 15 مئی 2026 19:25

لاہور(اُردو پوائنٹ اخبارتازہ ترین - این این آئی۔ 15 مئی2026ء) تحریک انصاف نظریاتی کے چیئرمین اختر اقبال ڈار نے کہا ہے کہ حکمران ریلوے ،پی آئی اے ،سٹیل مل اور دیگر اداروں کی تباہی کے بعد اب محکمہ تعلیم پر نظریں گاڑھے ہوئے ہیں تاکہ نہ کوئی پڑھ سکے ،سوچ سکے اور نہ ہی ملک ترقی کر سکے ۔ اپنے بیان میں اختر ڈار نے کہا کہ 365دنوں میں سے پہلے 120دن اور اب 90دن تک محدود کر کے ملک کی کون سی خدمت کی جا رہی ہے ۔

چین میں سال میں 220دن ،جاپان میں 210دن ،شمالی کوریا میں 190 دن پڑھایا جاتا ہے جبکہ ساتھ ہی دوہرے تعلیم نظام سسٹم کے تحت الیکٹریشن ،اے آئی کمپیوٹر ویلڈنگ ،جدید زرعی ٹیکنالوجی ،گرافک ڈئیزائننگ ،کارپینٹر ویلڈنگ اورآٹو مکینک جیسی تعلیم بھی دی جاتی ہے ،پڑھائی کے ساتھ عملی تربیت کے باعث نوجوان بیروزگار نہیں رہتے مگر پاکستان میں اس کے برعکس ہے ،یہاں توانائی بچت کے نام پر سکول بند کرکے بچوں کے مستقبل تاریک کیے جا رہے ہیں جبکہ خود حکمران تیل ،پٹرول ،گیس ،کیپسٹی پیمنٹ ،سولر سسٹم اور سورج کی دھوپ تک کو ذریعہ آمدن بنا کر عوام کو لوٹ رہے ہیں اور عیاشیوں میں مگن ہیں ۔

(جاری ہے)

انہوں نے کہا کہ پاکستان میں بھی ہر سکول میں فنی تعلیم لازم قرار دیتے ہوئے نویں جماعت سے سکلز ٹریننگ شروع کرنا ہوگی ،صنعتوں اور سکولوں کو آپس میں جوڑنا ہوگا ،ڈگری کے ساتھ ہنر کے منصوبے شروع کرکے معیشت کو مضبوط بنایا جا سکتا ہے ۔