بلاول بھٹو زرداری کا لاہور میں مصروف دن، منظور وٹو کے اہلخانہ سے تعزیت اور سیاسی ملاقاتیں

چیئرمین پیپلز پارٹی کی وٹو ہائوس آمد، مرحوم کی خدمات کو خراجِ عقیدت، مختلف سیاسی و سماجی شخصیات سے بھی ملاقاتیں کیں

منگل 19 مئی 2026 21:06

بلاول بھٹو زرداری کا لاہور میں مصروف دن، منظور وٹو کے اہلخانہ سے تعزیت ..

لاہور (اُردو پوائنٹ اخبارتازہ ترین - این این آئی۔ 19 مئی2026ء) پاکستان پیپلزپارٹی کے چیئرمین بلاول بھٹو زرداری نے صوبائی دارلحکومت لاہور میں مصروف دن گزارا۔وہ گورنر پنجاب سردار سلیم حیدر خان کے ہمراہ ماڈل ٹائون میں وٹو ہاس پہنچے اور سابق وزیراعلیٰ پنجاب و پی پی پی پنجاب کے سابق صدر میاں منظور وٹو کے انتقال پر انکی بیوہ پروین بیگم سے تعزیت کا اظہار کیا۔

چیئرمین بلاول بھٹو زرداری نے سابق وفاقی وزیر میاں منظور وٹو کے صاحبزادوں معظم جہانزیب وٹو، میاں خرم جہانگیر وٹو اور میاں ذیشان منظور وٹو سے اظہار افسوس کیا۔انہوں نے مرحوم کی صاحبزادیوں روبینہ شاہین وٹو، جہاں آرا وٹو، آمنہ قصوری، تبانہ شہزاد علی اور عائشہ منظور وٹو سے بھی رنج و غم کا اظہار کیا اور میاں منظور وٹو کے بلندی درجات کے لئے فاتحہ خوانی اور لواحقین کے صبرِ جمیل کی دعا کی۔

(جاری ہے)

اس موقع پر چیئرمین بلاول بھٹو زرداری نے کہا کہ میاں منظور وٹو کی پیپلز پارٹی اور عوام کے لیے خدمات یاد رکھی جائیں گی، منظور وٹو مرحوم نے پیپلز پارٹی کو پنجاب میں مضبوط کرنے کے لیے اپنا کردار ادا کیا، منظور وٹو پیپلز پارٹی کی اتحادی حکومت میں وزیراعلی پنجاب بھی رہے ۔اس موقع پر پی پی پی وسطی پنجاب کے سیکریٹری اطلاعات شہزاد سعید چیمہ اور پی پی پی لاہور کے صدر فیصل میر نے بھی سوگواران سے تعزیت کی۔

بعدازاں پاکستان پیپلزپارٹی کے چیئرمین بلاول بھٹو زرداری معروف سماجی و کاروباری شخصیت نواب شہزاد علی خان سے ان کی رہائش گاہ پر ملاقات کی ۔اس موقع پر انہوں نے نواب شہزاد علی خان کو ان کی صاحبزادی کی منگنی کی رسم کی مبارک دی۔اسکے بعد وہ رکن قومی اسمبلی اور پی پی پی شعبہ خواتین وسطی پنجاب کی صدر ثمینہ خالد گھرکی سے ملاقات کے لئے ان کی رہائش گاہ پر گئے اور سیاسی صورت حال پر تبادلہ خیال ہوا۔اس موقع پر پیپلز پارٹی کے پنجاب اسمبلی میں پارلیمانی لیڈر علی حیدر گیلانی اور پی پی لاھور کے رہنما اشرف خان بھی موجود تھے۔