Live Updates

اس وقت پوری دنیا تم سے اور اسرائیل سے نفرت کرتی ہے ، میں نہ ہوتا تو تم جیل میں ہوتے ، امریکی صدر کا اسرائیلی وزیر اعظم پربرہمی کا اظہار

منگل 2 جون 2026 11:46

واشنگٹن (اُردو پوائنٹ اخبارتازہ ترین - اے پی پی۔ 02 جون2026ء) امریکی صدر ڈونلڈ ٹرمپ نے اسرائیلی وزیراعظم بنجمن نیتن یاہو کو ایران کے ساتھ مذاکرات کو پٹڑی سے اتارنے کا الزام عائد کرتے ہوئے ان پر سخت برہمی کا اظہار کیا ہے۔ رشیا ٹوڈے نے امریکی نیوز ویب سائٹ ایکسیوس کے حوالے سے رپورٹ کیا ہے کہ اسرائیلی وزیراعظم سے فون پر گفتگو کے دوان امریکی صدر نے انہیں دوٹوک الفاظ میں سرزنش کرتے ہوئے کہا کہ تم پر جنون سوار ہے ، تم نے لبنان میں فوجی کارروائیاں تیز کرکے ایران کے ساتھ امریکا کے مذاکرات کو خطرے میں ڈال دیا۔

تمہیں پتا ہے کہ اس وقت پوری دنیا تم سے نفرت کرتی ہے ، پوری دنیا اسرائیل سے نفرت کرتی ہے ، اگر میں نہ ہوتا تو تم جیل میں ہوتے ،میں اب بھی تمہیں بچا رہا ہوں۔

(جاری ہے)

ایکسیوس کی رپورٹ کے مطابق امریکی حکام نے اس ٹیلی فون کال کو امریکی صدر ڈونلڈ ٹرمپ کے اقتدار سنبھالنے کے بعد دونوں رہنمائوں کے درمیان بدترین ٹیلی فون کال قرارد یا ہے ۔ امریکی صدر نے کہا کہ اسرائیل کو اپنے دفاع کا حق حاصل ہے لیکن اس نے لبنا ن کے خلاف طاقت کا غیر متناسب استعمال کیا ۔

اسرائیل نے لبنا ن میں فوجی کارروائیوں کے دوران پوری پوری عمارتوں کو منہدم کر دیا اور عام شہریوں کو نشانہ بنایا۔ دریں اثنا ایران نے لبنان میں اسرائیلی فوجی کارروائیاں بند کرنے کا مطالبہ کرتےہوئے کہا ہے کہ وہ یہ کارروائیاں جاری رہنے کی صورت میں نہ صرف مذاکرات معطل کر سکتا ہے بلکہ اس سے بڑھ کر بھی کوئی اقدام کر سکتا ہے۔