کشمیری بچے بھارتی ریاستی دہشت گردی کا سب سے زیادہ شکار ، ضلع بارہمولہ میں خاتون گرفتار

جمعرات 4 جون 2026 15:57

سرینگر (اُردو پوائنٹ اخبارتازہ ترین - اے پی پی۔ 04 جون2026ء) بھارت کے غیر قانونی زیر تسلط جموں وکشمیر میں معصوم کشمیر ی بچے بھارتی ریاستی دہشت گردی کا سب سے زیادہ شکار ہیں ۔ بے لگام بھارتی فورسز اہلکاروں نے جنوری 1989 سے اب تک933بچے شہید جبکہ ایک لاکھ8ہزار 7بچے یتیم کر دیئے ہیں۔کشمیر میڈیا سروس کے ریسرچ سیکشن کی طرف سے ’’جارحیت کا شکار معصوم بچوں کے عالمی دن‘‘ پر جاری کی گئی ایک رپورٹ میں کہا گیا کہ جنوری 1989 سے اب تک بھارتی فورسز کے ہاتھوں شہید ہونے والے 96ہزار 497 کشمیریوں میں 933 بچے بھی شامل ہیں۔

رپورٹ میں کہا گیا ہے کہ بھارتی فورسز اہلکاروں کی فائرنگ، پیلٹ چھروں اور آنسو گیس کے گولوں سے ہزاروں کشمیری زخمی ہوئے ہیں جن میں بیسیوں بچے اور بچیاں بھی شامل ہیں ۔

(جاری ہے)

مہلک پیلٹ چھرے لگنے سے سینکڑوں کشمیری بچے ایک یا دونوں آنکھوں کی بصارت سے محروم ہو چکے ہیں۔ مختلف جیلوں میں قید کشمیریوں میں کئی کم عمر کشمیری بچے میں شامل ہیں۔ بھارتی فورسز کی طرف سے ضلع راجوری کے علاقوں گمبھیر مغلاں اور ڈوریمل منجاکوٹ محاصر ے اور تلاشی کی پرتشدد کارروائی جمعرات کو 13ویں روز بھی جاری رہی ۔

فورسز کی شدید فائرنگ اور گولہ باری کے باعث علاقے میں شدید خوف و دہشت کا ماحول ہے۔بھارتی فورسز کا دعویٰ ہے کہ علاقے میں عسکریت پسند موجود ہیں تاہم قابض فورسزانہیں ڈھونڈ نکالنے میں تاحال ناکام ہیں۔ آپریشن کی وجہ سے علاقے کے رہائشی شدید مشکلات سے دوچارہیں۔ نئی دہلی کے مسلط کردہ لیفٹیننٹ گورنر کے ماتحت انتظامیہ نے انسداد منشیات مہم کی آڑمیں سرینگر میں ایک اور کشمیری شیخ تصدق کا تقریبا 2 کروڑ روپے مالیت کا تین منزلہ رہائشی گھر مسمار کر دیاہے۔

بی جے پی کی بھارتی حکومت نے انسداد منشیات کی نام نہاد مہم کی آڑ میں بھی کشمیریوں کو ان کے گھروں ، زمینوں اور دیگر املاک سے محروم کرنے کا ایک نیا سلسلہ شروع کر رکھا ہے ۔ بھارتی پولیس نے ضلع بارہمولہ کے علاقے ناروا میں ایک خاتون کو گھر پر چھاپے کے دوران کالے قانون’’ پبلک سیفٹی ایکٹ‘‘ کے تحت گرفتار کر لیا۔ کل جماعتی حریت کانفرنس کے ترجمان ایڈوکیٹ عبدالرشید منہاس نے سرینگر میں جاری بیان میں کشمیری بچوں کے ساتھ منظم بھارتی جبر کی شدید مذمت کرتے ہوئے اقوام متحدہ، او آئی سی، یورپی یونین اور بچوں کے حقوق کی بین الاقوامی تنظیموں سے مطالبہ کیا کہ وہ بچوں کو بھارتی ظلم و ستم سے بچانے کے لیے کردار ادا کریں۔

جموں و کشمیر ڈیموکریٹک فریڈم پارٹی کے ترجمان نے بیان میں مقبوضہ علاقے میں املاک کی ضبطی اور مسماری کی جاری لہر پر شدید تشویش کا اظہار کرتے کہا کہ اس کا مقصد کشمیریوں کو معاشی طورپر مفلوک الحال بنانا ہے۔