وزیراعظم کی ڈسکوز کی نجکاری کا عمل تیز کرنے کی ہدایت، پہلے مرحلے میں آئیسکو، گیپکو اور فیسکو شامل

منگل 9 جون 2026 23:18

اسلام آباد (اُردو پوائنٹ اخبارتازہ ترین - آن لائن۔ 09 جون2026ء) وزیراعظم شہباز شریف نے ڈسکوز کی نجکاری کا عمل تیز کرنے کی ہدایت کرتے ہوے کہا ہے کہ نجکاری کا تمام عمل شفاف بنایا جائے، خسارے سے دوچار سرکاری اداروں کی اصلاح اور نجکاری حکومت کی ترجیح ہے۔ وزیراعظم کی زیر صدارت بجلی تقسیم کار کمپنیوں (ڈسکوز) کی نجکاری کے حوالے سے ایک اہم جائزہ اجلاس منعقد ہوا، جس میں بجلی کے شعبے میں اصلاحات اور ڈسکوز کی نجکاری سے متعلق پیش رفت کا تفصیلی جائزہ لیا گیا۔

اجلاس سے خطاب کرتے ہوئے وزیراعظم شہباز شریف نے کہا کہ خسارے کا شکار ریاستی ملکیتی اداروں کی نجکاری حکومت کی اولین ترجیح ہے۔ انہوں نے متعلقہ حکام کو ہدایت کی کہ بجلی تقسیم کار کمپنیوں کی نجکاری کے عمل کو مزید تیز کیا جائے اور اس پورے عمل کو انتہائی شفاف انداز میں مکمل کیا جائے۔

(جاری ہے)

وزیراعظم نے اس بات پر بھی زور دیا کہ ڈسکوز کی نجکاری کے بعد صارفین کے مفادات کے تحفظ اور بجلی کی فراہمی کے مؤثر نظام کو یقینی بنانے کے لیے ایک مضبوط ریگولیٹری فریم ورک تشکیل دیا جائے۔

اجلاس کو بریفنگ میں بتایا گیا کہ نجکاری کے پہلے مرحلے میں اسلام آباد الیکٹرک سپلائی کمپنی (آئیسکو)، گوجرانوالا الیکٹرک پاور کمپنی (گیپکو) اور فیصل آباد الیکٹرک سپلائی کمپنی (فیسکو) کی نجکاری کی جائے گی۔ ان تینوں کمپنیوں کی نجکاری کے لیے ایکسپریشن آف انٹرسٹ ملکی اور بین الاقوامی اخبارات میں شائع کیا جا چکا ہے۔بریفنگ کے مطابق کابینہ کی نجکاری کمیٹی ان تینوں ڈسکوز کی نجکاری کے لیے ٹرانزیکشن اسٹرکچر کی منظوری دے چکی ہے، جبکہ سرمایہ کاروں کو راغب کرنے کے لیے روڈ شوز کا انعقاد رواں ماہ سے شروع کیا جا رہا ہے۔

مزید بتایا گیا کہ سعودی عرب، ترکیہ اور چین کے سرمایہ کاروں کے لیے بین الاقوامی سطح پر بھی خصوصی روڈ شوز منعقد کیے جا رہے ہیں۔اجلاس میں نائب وزیراعظم و وزیر خارجہ اسحاق ڈار، وفاقی وزیر قانون و انصاف اعظم نذیر احمد، وفاقی وزیر اقتصادی امور احد خان چیمہ، وفاقی وزیر خزانہ و محصولات محمد اورنگزیب، وفاقی وزیر پاور ڈویڑن سردار اویس لغاری، مشیر وزیراعظم برائے نجکاری محمد علی، وزیر مملکت برائے خزانہ و ریلوے بلال اظہر کیانی اور دیگر اعلیٰ سرکاری حکام نے شرکت کی۔