Live Updates

ویگو ڈالے بہت بڑی فحاشی ہیں، پارلیمنٹ لاجز کو ان سے بچایا جائے، خواجہ آصف کا سپیکر سے مطالبہ

وزیرِ دفاع کے اس مطالبے پر ایوان میں موجود ارکانِ اسمبلی مسکرا دیئے، کچھ ارکان کی جانب سے ڈیسک بجائے گئے

ساجد علی اتوار 21 جون 2026 22:52

ویگو ڈالے بہت بڑی فحاشی ہیں، پارلیمنٹ لاجز کو ان سے بچایا جائے، خواجہ ..

اسلام آباد (اُردو پوائنٹ اخبارتازہ ترین۔ 21 جون2026ء) وزیرِ دفاع خواجہ آصف نے قومی اسمبلی میں ویگو ڈالوں پر پابندی کا مطالبہ کرتے ہوئے کہا ہے کہ ویگو ڈالے بہت بڑی فحاشی ہیں، پارلیمنٹ لاجز کو ان سے بچایا جائے۔ تفصیلات کے مطابق قومی اسمبلی کے بجٹ اجلاس کے دوران اس وقت ایوان میں دلچسپ اور حیران کن صورتحال پیدا ہو گئی جب وفاقی وزیرِ دفاع خواجہ محمد آصف نے ملک میں سیاسی پکڑ دھکڑ اور خوف کی علامت سمجھے جانے والے "ویگو ڈالوں" پر سخت برہمی کا اظہار کرتے ہوئے ان پر پابندی عائد کرنے کا مطالبہ کردیا۔

بجٹ سیشن کے دوران اسپیکر سردار ایاز صادق سے مخاطب ہوتے ہوئے وزیرِ دفاع نے اپیل کی کہ "جناب اسپیکر! ویگو ڈالے بین ہونے چاہئیں، ویگو ڈالے سے بڑی فحاشی اور کوئی نہیں ہے، یہ گاڑیاں بہت بڑی ولگیرٹی ہیں، پارلیمنٹ اور پارلیمنٹ لاجز کو ان ویگو ڈالوں سے بچایا جائے"۔

(جاری ہے)

خواجہ آصف نے سیاست دانوں کے ساتھ بدلتے ہوئے وقت اور سیکیورٹی کے حالات پر طنز کرتے ہوئے ایوان میں اعتراف کیا کہ "جب ہم اقتدار میں ہوتے ہیں تو ہمارے آگے پولیس ہوتی ہے، اور جب ہم اقتدار میں نہیں ہوتے تو ہمارے پیچھے پولیس ہوتی ہے"، انہوں نے اسپیکر پر زور دیا کہ ارکانِ اسمبلی کے تحفظ اور پارلیمنٹ کے وقار کے لیے ان گاڑیوں کے لاجز میں داخلے اور استعمال پر پابندی لگائی جائے۔

جناب سپیکر ویگو ڈالے بین ہونے چاہئیں۔ویگو ڈالے سے بڑی فحاشی اور کوئی نہیں ہے۔ویگو ڈالے بہت بڑی vulgarity ہیں۔ پارلیمنٹ کو ویگو ڈالے سے بچائیں ۔ خواجہ آصف کی اسپیکر سردار ایاز صادق سے اپیل pic.twitter.com/HmA43OySoN
— Sehrish Maan (@SMunirMaan) June 21, 2026

قومی اسمبلی کے اجلاس میں وزیر دفاع خواجہ آصف نے مزید کہا کہ اسمبلی کے قواعد و ضوابط کا احترام سب پر لازم ہے اور ایوان کا ماحول خراب نہیں کیا جانا چاہیئے، اقبال آفریدی کے معاملے پر فیصلہ کرنا اسپیکر کا اختیار ہے اور موجودہ حالات میں سکیورٹی کے خطرات بڑھ چکے ہیں، اس لیے پارلیمنٹ کی سیکیورٹی پر خصوصی توجہ دینا ضروری ہے، لوگ پارلیمنٹ کے اندر آکر ویڈیوز بناتے ہیں اور پارلیمنٹ کو "مچھلی منڈی" بنا دیا گیا ہے، جو کسی صورت مناسب نہیں۔