مکہ مکرمہ، 15 محرم الحرام کو غسلِ کعبہ کی روح پرور تقریب، سعودی شاہی نمائندے اور سفارتکار شریک ہوں گے

اتوار 28 جون 2026 18:13

مکہ مکرمہ (اُردو پوائنٹ اخبارتازہ ترین - اے پی پی۔ 28 جون2026ء) خانہ کعبہ کو غسل دینے کی روح پرور تقریب 30جون (15محرم الحرام ) کو فجر کی نماز کے بعد ہوگی ۔حرمین شریفین کی انتظامیہ کے مطابق غسل کعبہ کی یہ تقریب 15 محرم الحرام 1448 ہجری، بروز منگل بمطابق 30 جون 2026ء کو علی الصبح نمازِ فجر کے فوراً بعد ادا کیا جائے گا۔ اس باوقار اور تاریخی تقریب میں خادم الحرمین الشریفین شاہ سلمان بن عبدالعزیز آل سعود کے خصوصی نمائندے، مکہ مکرمہ کے گورنر، حرمین شریفین کے ائمہ کرام، مسلم ممالک کے سفارتکار اور اعلیٰ ترین ملکی و غیر ملکی شخصیات شرکت کی سعادت حاصل کریں گی۔

سعودی میڈیا کے مطابق، غسلِ کعبہ کا یہ متبرک عمل اسلامی روایات اور طے شدہ سائنسی و انتظامی پروٹوکولز کے تحت انتہائی عقیدت اور احترام کے ساتھ انجام دیا جاتا ہے۔

(جاری ہے)

تقریب کا آغاز کلید بردارِ کعبہ کی موجودگی میں بیت اللہ کا سنہرا دروازہ کھولنے سے ہوتا ہے، جس کے بعد گورنر مکہ اور معزز مہمانانِ گرامی اندرونِ کعبہ داخل ہوتے ہیں۔ اس سے قبل ہی مسجد الحرام کی جنرل اتھارٹی غسل کے لیے ایک خاص محلول تیار کر لیتی ہے، جس میں کثیر مقدار میں متبرک آبِ زم زم، سعودی عرب کے شہر طائف کے دنیا بھر میں مشہور اور قیمتی عرقِ گلاب، اور اعلیٰ ترین معیار کے خالص عود کا عطر شامل کیا جاتا ہے۔

بیت اللہ کے اندرونی حصے کو غسل دینے کے لیے روایتی اور جدید دونوں طریقے اپنائے جاتے ہیں، جس کے تحت سفید رنگ کے سوتی اور ریشمی کپڑوں کو آبِ زم زم اور عرقِ گلاب کے اس معطر آمیزے میں بھگو کر کعبہ کی اندرونی دیواروں اور سنگِ مرمر کے ستونوں کو نرمی سے صاف کیا جاتا ہے۔ فرش پر عرقِ گلاب ملا آبِ زم زم بہا کر اسے کھجور کے پتوں اور خصوصی وائپرز کی مدد سے دھویا جاتا ہے۔

غسل کا عمل مکمل ہونے کے بعد پوری عمارت کو تولیوں سے خشک کیا جاتا ہے اور پھر کعبہ کے اندرونی حصے، ستونوں اور کونوں کو مشک، عنبر اور قیمتی عطریات سے معطر کر کے خالص عود کی دھونی دی جاتی ہے، جس سے پورا ماحول خوشبو سے مہک اٹھتا ہے۔ یہ پوری تقریب نبی کریم ﷺ کی اس سنتِ مبارکہ کی زندہ جاوید یادگار ہے جو انہوں نے فتح مکہ کے موقع پر ادا فرمائی تھی اور سعودی حکومت ہر سال اس مقدس روایت کو پوری شان و شوکت سے نبھاتی ہے۔