بانی پی ٹی آئی سے اہل خانہ اور وکلا کی ملاقات نہ کرانا تشویشناک ہے، سلمان صفدر

منگل 30 جون 2026 21:51

اسلام آباد (اُردو پوائنٹ اخبارتازہ ترین - آن لائن۔ 30 جون2026ء) اسلام آباد ہائیکورٹ کے باہر میڈیا سے گفتگو کرتے ہوئے بانی پی ٹی آئی کے وکیل سلمان صفدر نے کہا ہے کہ بانی پی ٹی آئی سے اہلِ خانہ اور وکلا کی ملاقات نہ کرانا باعثِ تشویش ہے، جبکہ عدالت میں اس حوالے سے تفصیلی دلائل پیش کیے گئے ہیں۔انہوں نے کہا کہ اس معاملے میں نیب کی موجودگی بنتی نہیں تھی، تاہم نیب کی جانب سے یہ مؤقف اختیار کیا جا رہا تھا کہ ایک بہن اپنے بھائی یا ایک بیٹی اپنی والدہ کی جانب سے درخواست کیسے دائر کر سکتی ہے۔

سلمان صفدر کے مطابق خاندان کے تحفظات جیل سپرنٹنڈنٹ اور آئی جی جیل خانہ جات کے طرزِ عمل سے متعلق ہیں۔ ان کا کہنا تھا کہ اگر درخواست دائر ہونے کے بعد بشریٰ بی بی سے ملاقات کروا بھی دی جائے تو ایسی ملاقات اپنی اہمیت کھو دیتی ہے۔

(جاری ہے)

انہوں نے دعویٰ کیا کہ بانی پی ٹی آئی کی بہنیں گزشتہ چھ ماہ سے اپنے بھائی سے ملاقات کی کوشش کر رہی ہیں، لیکن انہیں اجازت نہیں دی جا رہی۔

ان کے بقول وکلا کو بھی اپنے مؤکل سے ملاقات کی اجازت نہیں مل رہی، جس کے باعث ان کے پاس وکالت نامے تک موجود نہیں ہیں۔سلمان صفدر نے کہا کہ عدالت نے دونوں فریقین کا مؤقف سنا اور ان کی جانب سے تفصیلی دلائل دیے گئے۔ انہوں نے مزید کہا کہ قانونی نمائندگی میں رکاوٹیں انصاف کے تقاضوں کے منافی ہیں اور ہر شخص کے ساتھ انسانی وقار کے مطابق برتاؤ ہونا چاہیے۔انہوں نے دعویٰ کیا کہ مختلف مقدمات میں وہ اپنی بے گناہی ثابت کر چکے ہیں اور انہیں اسلام آباد ہائیکورٹ سے ہمیشہ انصاف ملا ہے۔ سلمان صفدر نے اس امید کا اظہار بھی کیا کہ عدالتی نظام انصاف کی فراہمی کا سلسلہ آئندہ بھی جاری رکھے گا، کیونکہ "اگر نظامِ عدل ختم ہو جائے تو پھر معاشرے میں کچھ بھی باقی نہیں رہتا۔"