مشیر سیاحت خیبرپختون خواہ ملک عدیل اقبال کا سوات میں کشتی الٹنے سے6 افراد کی ہلاکت پر گہرے دکھ کا اظہار

حادثے کی مکمل تحقیقات کروائی جائیں گی اور ذمہ داران کو انصاف کے کٹہرے میں لایا جائے گا. ملک عدیل اقبال‘ صوبے بھر کے سیاحتی مقامات پر کشتی رانی‘جھولوں سمیت دیگر تفریحی سہولیات کی مکمل جانچ کرنے‘فٹنس چیک کرنے اور سیفٹی کے معیار کو یقینی بنانے کی ہدایات

میاں محمد ندیم بدھ 1 جولائی 2026 22:39

مشیر سیاحت خیبرپختون خواہ ملک عدیل اقبال کا سوات میں کشتی الٹنے سے6 ..

پشاور(اردوپوائنٹ اخبارتازہ ترین-انٹرنیشنل پریس ایجنسی۔یکم جولائی ۔2026 ) خیبرپختون خواہ کے مشیر برائے سیاحت ملک عدیل اقبال نے سیف اللہ جھیل کالام میں کشتی الٹنے سے ایک ہی خاندان کے6 افراد کی ہلاکت پر گہرے دکھ کا اظہار کرتے ہوئے متعلقہ حکام سے رپورٹ طلب کرلی ہے. ملک عدیل اقبال نے کہا کہ حادثے کی مکمل تحقیقات کروائی جائیں گی اور ذمہ داران کو انصاف کے کٹہرے میں لایا جائے گا‘انہوں نے حکام کو صوبے بھر کے سیاحتی مقامات پر کشتی رانی‘جھولوں سمیت دیگر تفریحی سہولیات کی مکمل جانچ کرنے‘فٹنس چیک کرنے اور سیفٹی کے معیار کو یقینی بنانے کی ہدایات کی ہیں.

(جاری ہے)

انہوں نے کہا کہ گرمیوں میںملک بھر سے ہمارے بہن ‘بھائی سیاحت کے لیے خیبرپختون خواہ کے سیاحتی علاقوں کا رخ کرتے ہیں‘سردیوں میں بھی لاکھوں افراد برفباری سے لطف اندوزہونے کے لیے صوبے کے سیاحتی مقامات پر آتے ہیں‘سیاحوں کے تحفظ اور ان کی حفاظت کے پی کے حکومت کی اولین ترجیح ہے . ملک عدیل اقبال نے کہا کہ تحریک انصاف کے بانی چیئرمین عمران خان کے ویژن کے مطابق وزیراعلی سہیل آفریدی کی قیادت میں محکمہ سیاحت وثقافت سیاحت کے فروغ کے لیے کوشاں ہے انہوں نے کہاکہ حادثے میں بچوں اور خواتین سمیت 6افراد کی ہلاکت پر وہ ذاتی طورپر امدادی کاروائیوں کی نگرانی کررہے ہیں اور ضلعی انتظامیہ سمیت متعلقہ حکام سے رابطے میں ہیں.

انہوں نے بتایا کہ وزیراعلی سہیل آفریدی بھی تمام ترمصروفیات ترک کرکے سوات کی ضلعی انتظامیہ سے رابطے میں ہیں ‘انہوں نے یقین دہانی کروائی کہ حادثے کی مکمل شفاف اور غیرجانبدارانہ تحقیقات کروائی جائیں گی اور اگر اس میں انسانی غفلت پائی گئی تو ذمہ داران کے خلاف سخت کاروائی عمل میں لائی جائے گی. ملک عدیل اقبال نے بتایا کہ صوبے بھر میں ہنگامی بنیادوں پر کشتی رانی اور جھولوں وغیرہ سمیت تفریحی سہولیات کی مکمل جانچ کی جائے گی اور فٹنس سرٹیفکیٹ نہ رکھنے والے آپریٹرکو جھیلوں میں کشتیاں چلانے یا جھولے وغیرہ لگانے کی اجازت نہیں دی جائے گی.