مصنوعی ذہانت کے بے لگام گھوڑے کو قابو میں لانا کیوں ضروری؟

اسلام آباد (اُردو پوائنٹ ۔ UN اردو۔ 02 جولائی 2026ء) مصنوعی ذہانت پر اقوام متحدہ کے آزاد بین الاقوامی سائنسی پینل نے خبردار کیا ہے کہ اس ٹیکنالوجی کی صلاحیتیں برق رفتار سے بڑھ رہی ہیں جبکہ اس کے محفوظ اور ذمہ دارانہ استعمال کو یقینی بنانے والے قوانین اور ضوابط اس رفتار کا ساتھ نہیں دے پا رہے۔

پینل کی جانب سے اس مسئلے پر جاری کردہ رپورٹ میں بتایا گیا ہے کہ چند سال پہلے تک مصنوعی ذہانت صرف سوالوں کے جواب دے سکتی تھی یا تحریری مواد تیار کر سکتی تھی۔

(جاری ہے)

رپورٹ میں کہا گیا ہے کہ مصنوعی ذہانت میں ترقی بہت سے فوائد کے ساتھ خطرات بھی لائی ہے۔

مصنوعی ذہانت کی نئی نسل

مصنوعی ذہانت مستقبل میں انسانیت کی ایک بہت بڑی انقلابی ٹیکنالوجی ثابت ہو سکتی ہے۔ اگر اسے ذمہ دارانہ طور سے استعمال کیا جائے تو یہ صحت، تعلیم، سائنسی تحقیق، زراعت اور معذور افراد کے لیے سہولیات میں نمایاں بہتری لا کر پائیدار ترقی کے اہداف کی جانب پیش رفت کو تیز کر سکتی ہے۔

تاہم، رپورٹ میں کہا گیا ہے کہ مناسب حفاظتی اقدامات نہ کیے گئے تو یہی ٹیکنالوجی عدم مساوات میں اضافے، جھوٹی معلومات کے پھیلاؤ، انسانی حقوق کے لیے خطرات، روزگار کے مواقع میں خلل اور مصںوعی ذہانت کی طاقت کو چند حکومتوں اور بڑی کمپنیوں تک محدود کرنے کا باعث بن سکتی ہے۔

اب مصنوعی ذہانت کی نئی نسل سامنے آ رہی ہے جو صرف سوالات کے جواب دینے تک محدود نہیں رہے گی بلکہ اس کے ایسے ایجنٹ سامنے آ رہے ہیں جو خود منصوبہ بندی کر سکتے ہیں، ڈیجیٹل آلات استعمال کر سکتے ہیں، سافٹ ویئر لکھ سکتے ہیں اور پیچیدہ کام تقریباً انسانی نگرانی کے بغیر مکمل کر سکتے ہیں۔

غیرمعمولی فوائد

رپورٹ میں بتایا گیا ہے کہ مصنوعی ذہانت سے کئی شعبوں میں مفید کام لیا جا رہا ہے۔

طبی میدان میں انقلابی پیش رفت: مصنوعی 20 کروڑ سے زیادہ پروٹینز کی ساخت کی پیش گوئی کر چکی ہے جس سے نئی ادویات، ویکسین اور جراثیمی مزاحمت پر تحقیق میں غیر معمولی تیزی آئی ہے۔

صحت کی سہولیات میں بہتری: ڈاکٹرمصنوعی ذہانت کی مدد سے چھاتی کے سرطان جیسی بیماریوں کی بروقت تشخیص کر رہے ہیں جبکہ ترقی پذیر ممالک میں طبی عملہ مقامی زبانوں پر مبنی مصنوعی ذہانت کے آلات کے ذریعے مریضوں کو بہتر خدمات فراہم کر رہا ہے۔

غذائی تحفظ: مصنوعی ذہانت سے چلنے والے ابتدائی انتباہی نظام خوراک کی قلت کو بحران بننے سے پہلے ہی شناخت کرنے میں مدد دے رہے ہیں۔

بہتر زندگی کے مواقع: مصنوعی ذہانت سائنسی تحقیق کو فروغ دے رہی ہے، جسمانی معذور افراد کے لیے ٹیکنالوجی کو زیادہ سے زیادہ قابل رسائی بنا رہی ہے اور تعلیم و ذہنی صحت کے شعبوں میں معاونت کے نئے مواقع پیدا کر رہی ہے۔

ماہرین کے خدشات

مصنوعی ذہانت میں ترقی کے ساتھ کئی نئے خطرات بھی جنم لے رہے ہیں۔

آن لائن استحصال: مصنوعی ذہانت جنسی استحصال پر مبنی مواد اور جعلی فحش تصاویر اور ویڈیوز (ڈیپ فیکس) کے پھیلاؤ کو بڑھا رہی ہے جس کا سب سے زیادہ نشانہ خواتین اور بچے بن رہے ہیں۔

غلط معلومات کا پھیلاؤ: یہ ٹیکنالوجی ایسی جھوٹی معلومات تیار کر سکتی ہے جو حقیقی محسوس ہوتی ہیں اور ان سے عوامی اعتماد، جمہوری عمل اور سماجی مباحث متاثر ہو سکتے ہیں۔

جرائم میں اضافہ: جرائم پیشہ عناصر مصنوعی ذہانت کو سائبر حملوں اور مالی و سماجی دھوکہ دہی جیسے جرائم کے لیے استعمال کر رہے ہیں۔

ذہنی صحت کے مسائل: مصنوعی ذہانت کے بعض نظام نقصان دہ خیالات اور رویوں کو تقویت دیتے ہیں جو ذہنی صحت کے شدید بحران حتیٰ کہ خودکشی جیسے سنگین نتائج کا سبب بن سکتے ہیں۔

اختیار کا مسئلہ: مصںوعی ذہانت کی خود مختاری میں اضافے کے ساتھ ماہرین کو خدشہ ہے کہ موثر حفاظتی اقدامات کے بغیر اس کی نگرانی اور اس پر موثر کنٹرول رکھنا مشکل ہو جائے گا۔

ماحولیاتی اثرات: مصنوعی ذہانت کی ٹیکنالوجی کے بڑے ڈیٹا مراکز توانائی کا بہت زیادہ استعمال کرتے ہیں جس سے گرین ہاؤس گیسوں کا اخراج بڑھتا ہے اور عالمی حدت میں اضافہ ہوتا ہے۔

ٹیکنالوجی پر غیرمساوی اختیار

رپورٹ کے مطابق، مصنوعی ذہانت پر مبنی دنیا کے جدید ترین سپر کمپیوٹرز کی تقریباً 75 فیصد صلاحیت امریکہ اور 15 فیصد چین کے پاس ہے۔

بہت سے ترقی پذیر ممالک کے پاس کمپیوٹنگ کا بنیادی ڈھانچہ، تکنیکی مہارت، سرمایہ کاری، معیاری ڈیٹا اور مقامی زبانوں کے وسائل موجود نہیں جس کے باعث وہ ایسی ٹیکنالوجی پر انحصار کرنے پر مجبور ہیں جسے نہ وہ خود تیار کر سکتے ہیں، نہ اس کا موثر جائزہ لے سکتے ہیں اور نہ ہی اسے اپنی معاشرتی ضروریات کے مطابق ڈھال سکتے ہیں۔

رپورٹ میں خبردار کیا گیا ہے کہ اگر اس فرق کو دور نہ کیا گیا تو مصنوعی ذہانت عدم مساوات کو کم کرنے کے بجائے مزید بڑھا سکتی ہے۔

مصنوعی ذہانت کی ضابطہ بندی

رپورٹ میں کہا گیا ہے کہ دنیا میں موجودہ حکومتی اور قانونی نظام اس قدر تیزی سے ترقی کرتی ٹیکنالوجی کو اپنے قابو میں رکھنے کی صلاحیت سے محروم ہیں۔

حکومتوں کو اس معاملے میں ایک ایسے مسئلے کا سامنا ہے جسے ماہرین شواہد کا مخمصہ قرار دیتے ہیں۔ قانون سازی کے لیے قابل اعتماد سائنسی شواہد درکار ہوتے ہیں، مگر مصنوعی ذہانت کے حوالے سے جب تک یہ شواہد دستیاب ہوتے ہیں تب تک ٹیکنالوجی ایک نئی منزل طے کر چکی ہوتی ہے۔

اگرچہ دنیا کے مختلف حصوں میںمصنوعی ذہانت سے متعلق 40 سے زیادہ ضابطے، اخلاقی اصول اور انتظامی طریقہ کار موجود ہیں، لیکن ان میں سے بیشتر منتشر، غیر مساوی اور غیرآموزدہ ہیں۔ علاوہ ازیں، مصنوعی ذہانت سے وابستہ مسائل کا جائزہ بھی اکثر وہی کمپنیاں لیتی ہیں جو یہ ٹیکنالوجی خود تیار کر رہی ہوتی ہیں۔

رپورٹ میں کہا گیا ہے کہ مصنوعی ذہانت کو محفوظ، شفاف اور جوابدہ بنانے کے لیے اس کی آزادانہ جانچ، بین الاقوامی تعاون اور مشترکہ عالمی معیارات ناگزیر ہیں۔

اقوام متحدہ کے اقدامات

اقوام متحدہ مصنوعی ذہانت سے متعلق بہتر عالمی انتظام کے لیے ایک نئے بین الاقوامی نظام کی تشکیل میں معاونت فراہم کر رہا ہے۔ جنرل اسمبلی نے 2025 میں مصنوعی ذہانت پر آزاد بین الاقوامی سائنسی پینل برائے قائم کیا تھا جس میں دنیا کے مختلف خطوں سے تعلق رکھنے والے 40 ماہرین اپنی ذاتی حیثیت میں خدمات انجام دے رہے ہیں۔

اس پینل کا کردار قانون سازی نہیں بلکہ سائنسی بنیادوں پر مصںوعی ذہانت کے فوائد، خطرات اور اثرات کا باقاعدگی سے جائزہ لینا اور ایسی آزاد رپورٹس تیار کرنا ہے جن کی بنیاد پر حکومتیں اپنی پالیسیاں تشکیل دے سکیں۔

پینل کی سفارشات مصںوعی ذہانت کے انتظام سے متعلق عالمی مکالمے میں پیش کی جائیں گی جس کا آغاز 6 جولائی 2026 کو جنیوا میں ہو گا۔ اس موقع پر رکن ممالک مصںوعی ذہانت کی ضابطہ بندی کے مختلف طریقوں پر غور کریں گے۔