پیپلز پارٹی، ایم کیو ایم اور ن لیگ کراچی میں پانی کا بحران پیدا کرکے مگر مچھ کے آنسو بہاتی ہیں،منعم ظفر خان

تینوں جماعتوں کا حکومتی اتحاد کے فور منصوبے کی راہ میں 20 سال سے رکاوٹ بنا ہواہے، حکومتی سرپرستی میں ٹینکر مافیا اربوں کما رہا ہے، عوام پانی سے محروم ہیں ،2029 تک بھی کے فور کا مکمل نہ ہونا اہل کراچی کے ساتھ بڑا ظلم ہے ،پانی کے بحران پر ردعمل

منگل 14 جولائی 2026 21:35

کراچی(اُردو پوائنٹ اخبارتازہ ترین - این این آئی۔ 14 جولائی2026ء) امیر جماعت اسلامی کراچی منعم ظفر خان نے کراچی میں پانی کے دیرینہ بحران اور کے فور منصوبے کے مسلسل تعطل کے شکار رہنے کے حوالے سے اپنے ایک بیان میں کہا ہے کہ پیپلز پارٹی، ایم کیو ایم اور ن لیگ کراچی میں پانی کا بحران پیدا کرکے مگر مچھ کے آنسو بہاتی ہیں، تینوں جماعتوں کا حکومتی اتحاد کے فور منصوبے کی راہ میں 20 سال سے رکاوٹ بنا ہوا ہے، جبکہ حکومتی سرپرستی میں ٹینکر مافیا اربوں کما رہا ہے اور کراچی کے عوام پانی سے محروم ہیں ۔

منعم ظفر نے کہا ہے کہ گزشتہ دنوں قومی اسمبلی کی قائمہ کمیٹی کو بتایا گیا ہے کہ کے فور منصوبہ مزید تاخیر کا شکار ہوگا اور جو منصوبہ 2028 میں مکمل ہونا تھا اب 2029 تک بھی مکمل نہیں ہوسکے گا یہ اہل کراچی کے ساتھ بڑا ظلم ہے ۔

(جاری ہے)

سابق سٹی ناظم نعمت اللہ خان نے اہل کراچی کے لیے پانی کا منصوبہ کے تھری منصوبہ مقررہ مدت سے پہلے اور کم لاگت میں مکمل کیا تھا، جبکہ کے فور منصوبے کو 20سال گزرنے کے باوجود مکمل نہیں کیا جاسکا اور اس کا 3مرتبہ افتتاح کیا جاچکا ہے۔

آگمینٹیشن کا کام بھی ناقص معیار کے باعث تین مرتبہ روکا جاچکا ہے۔کراچی کی نصف سے زائد آبادی آج بھی پینے کے صاف پانی سے محروم ہے۔ کے فور منصوبہ اگر اپنے وقت پر مکمل ہوجاتا تو کراچی کے عوام آج پانی کی کمی اور بحران کی موجودہ بدترین صورتحال سے دوچار نہ ہوتے ، انہوں نے کہا کہ چند روز قبل دھابیجی کے مقام پر لائن پھٹنے سے تقریباً 100 ملین گیلن پانی ضائع ہوگیا،پانی کی لائنوں کا بار بار پھٹ جانا معمول بن چکا ہے اور حکومت اس سنگین بحران کے حل میں مکمل طور پر ناکام ہوچکی ہے، جبکہ دوسری جانب ٹینکر مافیا اربوں روپے کا پانی فروخت کررہا ہے۔ عوام کو گھروں کے نلکوں میں تو پانی نہیں ملتا لیکن ٹینکروں کو مل جاتا ہے اور شہری مہنگے داموں ٹینکر خریدنے پر مجبور ہیں ۔