پاکستان ہاکی کی بحالی کے لیے تاریخی پروگرام، قومی ٹیموں کے مصروف ترین بین الاقوامی شیڈول کا اعلان

ہفتہ 18 جولائی 2026 22:16

لاہور (اُردو پوائنٹ اخبارتازہ ترین - این این آئی۔ 18 جولائی2026ء) پاکستان ہاکی فیڈریشن کی ایڈہاک مینجمنٹ نے ملک میں ہاکی کی بحالی اور کھلاڑیوں کو عالمی سطح پر مواقع فراہم کرنے کے لیے ایک بے مثال اور تاریخی پروگرام کا انعقاد کیا ہے ۔ فیڈریشن کو سونپی گئی بنیادی ذمہ داریوں کے تحت انڈر 18، انڈر 21اور سینئر قومی ٹیموں (مرد و خواتین)کے لیے مالی وسائل متحرک کیے گئے ہیں تاکہ انہیں زیادہ سے زیادہ بین الاقوامی ایکسپوژر مل سکے اور ساتھ ہی ڈومیسٹک ہاکی کو بھی نئے سرے سے زندہ کیا جا سکے۔

الحمدللہ!ایڈہاک مینجمنٹ نے اپنے ابتدائی چار ماہ کے دوران اور سال کے اختتام تک کے لیے پاکستان ہاکی کی تاریخ کا مصروف ترین شیڈول ترتیب دیا ہے، جس کے تحت درج ذیل عالمی سرگرمیاں یقینی بنائی گئی ہیں۔

(جاری ہے)

سینئر مینز ٹیم: قاہرہ میں ورلڈ کپ کوالیفائر میں شرکت، ایف آئی ایچ پرو لیگ کے لیے بیلجیم اور برطانیہ کا دورہ، ستمبر میں کوریا کا اہم دورہ، اور آنے والے ایف آئی ایچ ورلڈ کپ اور ایشین گیمز میں شرکت۔

انڈر 18بوائز ٹیم: جاپان میں انڈر 18ایشیا کپ اور عمان میں ایشین 5-ای-سائیڈ چمپئن شپ میں شرکت۔انڈر 21مینز ٹیم: عمان کا دوطرفہ انٹرنیشنل سیریز کے لیے دورہ، چین میں جونیئر ایشیا کپ اور ملائیشیا میں سلطان آف جوہر کپ میں شرکت۔خواتین کی ٹیمیں: عمان میں جونیئر ٹورنامنٹ کے لیے انڈر 21ویمنز ٹیم کی شرکت جبکہ انڈر 18گرلز ٹیم اس وقت عمان میں انڈر 18ایشیا کپ میں ملک کی نمائندگی کر رہی ہے۔

بین الاقوامی مقابلوں کے ساتھ ساتھ فیڈریشن نے ملک بھر سے ابھرتے ہوئے ٹیلنٹ کو سامنے لانے کے لیے پاکستان انڈر 18نیشنل چمپئن شپ اور پاکستان گرلز انڈر 21نیشنل چمپئن شپ کا کامیابی سے انعقاد کیا ہے۔ کھلاڑیوں کی حوصلہ افزائی کے لیے چمپئن ، رنر اپ اور تیسری پوزیشن حاصل کرنے والی ٹیموں کو بھاری نقد انعامات سے نوازا گیا ہے۔اس پورے پروگرام میں حکومت پاکستان نے کلیدی کردار ادا کیا ہے۔

حکومت نے کھلاڑیوں کے روزمرہ کے اخراجات (ڈیلی الائونس)میں بڑا اضافہ منظور کیا ہے۔ اب سینئر ٹیم کے کھلاڑیوں کو 110امریکی ڈالر روزانہ اور جونیئر ٹیم کے کھلاڑیوں کو 65امریکی ڈالر روزانہ الانس دیا جا رہا ہے تاکہ بیرون ملک پاکستان کی نمائندگی کے دوران کھلاڑیوں کو بہترین مالی مدد حاصل ہو سکے۔پاکستان ہاکی فیڈریشن کا یہ جامع اور متوازن منصوبہ کھلاڑیوں کی فلاح و بہبود، ڈومیسٹک ہاکی کی مضبوطی اور بین الاقوامی ایکسپوژر کے ذریعے قومی کھیل کو دنیا کے نقشے پر اس کا کھویا ہوا مقام واپس دلانے کے عزم کا عکاس ہے۔